Aruba Fair Trade Authority (AFTA) ta presenta su agenda pa 2026. E aña aki ta marca e comienso di supervision riba proteccion di consumidor cual AFTA ta encarga cu ne. Riba 15 di maart, Dia Mundial di Consumidor, e ley nobo di supervision ta drenta na vigor. For di e fecha aki AFTA lo actua ora derechonan collectivo di consumidornan ta wordo viola. Riba 14 di maart AFTA ta organisa un Car Rally unda participantenan ta wordo encurasha di un forma competitivo y dibertido pa siña mas tocante nan derechonan como consumidor.
E aña aki e autoridad independiente ta concentra particularmente riba e industrua di auto, garantia riba airco, transporte di container y transaccionnan haci cu carchi di pago.
Pa media di un investigacion di mercado cu lo wordo hasi den e industria di auto, AFTA lo indentifica e desafionan cu e consumidornan y empresanan ta enfrenta na e momento di compra y benta di auto. Tambe AFTA lo haci un investigacion pa evalua e grado di cumplimento cu e leynan di garantia y e derechonan di e consumidornan Arubano den pratica. Siguientemente, den promer kwartaal AFTA lo publica resultadonan di su investigacion di mercado riba transporte di container. Por ultimo, conclusionnan y recomendacionnan di e investigacion di 2025 riba tarifanan pa transaccionnan haci cu carchi di pago ya caba a wordo discuti cu mayoria di partidonan concerni. AFTA lo traha un concepto pa un proposicion di ley pa baha tarifanan di transaccionnan haci cu carchi di pago. Esaki ta un prioridad pa AFTA, pasobra e tarifanan na Aruba ta considerablemente mas halto cu den otro regionnan y anualmente aproximadamente Afl. 45 miyon ta sali for di economia di Aruba.
Cooperacion cu investigacionnan di AFTA ta obligatorio segun ley. E hunta di directiva di AFTA kier a referi na e multanan cu Fair Trade Authority Curaçao cu e expectative cu empresanan na Aruba ta realisa e consequencianan ora no coopera tambe ta grandi. Roly Sint Jago ta bisa tocante e asunto aki: “Nos lo reacciona mas severo cu antes riba empresanan cu no cumpli cu e peticion pa entrega informacion pidi dentro di un tempo rasonabel.”
AFTA ta e autoridad independiente y imparcial di Aruba cu ta supervisa e funcionamiento correcto di mercadonan na beneficio di empresa y consumidor. AFTA ta investiga mercadonan riba Aruba y ta actua si tin infraccion contra ley. AFTA tin podernan pa preveni mal comportacion di empresa y si ta necesario lo sanciona. Pa mas informacion tocante AFTA, nos programa anual completo 2026, raportonan di nos investigacionnan y otro actividadnan, bishita nos website www.AFTA.aw of pagina di Facebook.
