Aruba Fair Trade Authority (AFTA) a realisa un investigacion di mercado riba distribucion di cuminda y otro productonan esencial. AFTA a conclui cu pa hopi producto di marca cu ta wordo bendi rond di Aruba, tin solamente un distribuidor. Esaki ta reduci competencia y ta resulta den prijsnan mas halto. Si productonan di mesun marca ta wordo importa pa otro distribuidor via importacion paralelo, lo tin mas competencia y esaki lo baha e prijsnan. Restriccion di importacion paralelo ta prohibi. AFTA por impone boet den caso di violacion.
Den un video cortico, presidente di hunta di directiva di AFTA, señor Roly Sint Jago, ta splica e resultado di investigacion. E ta bisa: “AFTA ta promove un mercado habri caminda competencia husto ta contribui na prijsnan mas abou, mas calidad y mas inovacion.”
Si diferente distribuidor bende e mes un marca, nan mester competi cu otro riba prijs. Esaki lo resulta na prijsnan mas abou. Distribuidor oficial den exterior di un marca of product di marca por dicidi di nombra solamente un distribuidor oficial pa Aruba pero ta prohibi pa obstrui importacion paralelo. Si companianan hasi esaki, AFTA por impone un boet. AFTA ta stimula companianan y consumidornan cu ta sospecha cu importacion paralelo ta wordo obstrui, pa notifica AFTA pa asina AFTA por inicia un investigacion specifico.
AFTA ta e autoridad independente y imparcial di Aruba cu ta supervisa e funcionamento corecto di mercadonan. Nos supervicion ta enfoca riba proteccion di competencia segun e ley. Nos ta investiga mercadonan riba Aruba door di solicita informacion, entrevista i bishita di sito anuncia y no anuncia. Companianan ta obliga segun ley pa colabora cu investigacion di AFTA. AFTA lo tuma accion pa preveni y, ora ta necesario, penalisa conducta anti-competitivo di companianan. Den 2026 AFTA tambe lo tin e poder pa supervisa derechonan di consumidornan. Pa mas informacion tocante AFTA y e reporte completo, por bishita nos website www.AFTA.aw
