Aruba Fair Trade Authority (AFTA) ta e autoridad independiente cu ta promove competencia husto y efectivo na Aruba. Hopi pais tin un autoridad similar pa garantisa cu e mercado ta funciona manera debe ser pa consumidornan y negoshinan.
Na cuminsamento di mei, AFTA a participa na un conferencia anual di Red International di Competencia (ICN, International Competition Network) cual a tuma lugar na Edimburgo, Escocia. ICN ta un organisacion na cual practicamente tur autoridadnan di competencia rond mundo ta miembro di dje. Durante e conferencia aki, cual a dura tres dia, a comparti desaroyonan den e area di ley di competencia den diferente pais, y hopi contacto a wordo estableci y fortalece cu dirigentenan di otro autoridadnan di competencia y cu organisacionnan internacional manera Comision Europeo y OECD. Presidente di e Conseho di Directiva, Roly Sint Jago, a bisa tocante di esaki: “Cooperacion cu autoridadnan di competencia di otro pais ta fortalece AFTA. Esaki ta wordo refleha tambe den nos investigacionnan tocante empresanan internacional cu ta opera na Aruba. Nos no ta para nos so y nos retonan no ta unico.”
AFTA a tuma e iniciativa pa organisa un sesion special tocante y pa “economianan di isla chikito” durante e conferencia. E asistencia na e sesion aki tabata grandi y e interaccion tabata anima. Economianan insular chikito ta enfrentando hopi retonan comun. Durante e sesion, cu a ser presidi pa e director di AFTA, Ernesto Kross, representantenan di Islandia, Nueva Caledonia, Jersey y Polinesia Frances tambe a duna un charla. A trata temanan manera e competencia deficiente den transporte di container, efectonan di acuerdonan di importacion exclusivo, gastonan di bida halto y e importancia pa haci estudio general di mercado. E publico tambe a trece ideanan interesante dilanti. E sesion special aki a resulta di satisface e necesidad pa intercambia puntonan di bista tocante e retonan cu islanan chikito ta enfrentando. A palabra cu proximo anja lo presta mas atencion na islanan chikito durante e congreso cu lo wordo organisa na cuminsamento di mei na Manila, Filipina.
Ta usual den e conferencia aki cu delegacionnan di autoridadnan di competencia ta wordo acompaña pa e asina yama Conseheronan No-Gubernamental. Hopi biaha nan ta academiconan of abogadonan. AFTA lo acerca Universidad di Aruba y Colegio di Abogadonan pa explora si na Aruba tin e disponibilidad, pa asina otro aña forma parti di e delegacion Arubano na e conferencia aki ariba propio gastonan. Conseho di Directiva di AFTA ta mira e importancia di inverti, hunto cu otro partidonan interesa, den desaroyo di conocemento tocante e reglanan di competencia, cu ta relativamente nobo na Aruba.
AFTA ta sigui comprometi cu e optimalisacion di competencia na Aruba y cu evita cu negoshinan ta abusa di nan posicion di poder pa asina negoshinan haci nan esfuerso maximo pa satisface e necesidadnan di e consumidor. Desde di oktober e aña aki, AFTA tambe lo supervisa cumplimento cu e derechonan di e consumidor. Den caso di violacion colectivo di e derechonan di e consumidor, AFTA por tuma medida di ehecucion.
E obhetivo di competencia optimal y proteccion di e consumidor ta pa logra baha e prijsnan, variedad mas grandi, calidad mihor y productonan y servicionan innovativo pa e consumidor. Negoshinan ta beneficia di condicionnan di competencia husto, un clima di inversion mihor y oportunidadnan mihor pa negoshinan nobo sin obstaculonan innecesario. Tur esaki pa stimula e crecemento economico y e prosepridad di Aruba. Bishita e website www.afta.aw pa haya mas informacion tocante AFTA y pa wak e reportenan completo cu AFTA a publica. Si bo ta na haltura di un violacion di reglanan di competencia, tuma contacto cu AFTA.
