Cu un conferencia di prensa na Sede di Fundacion Rancho a duna inicio na Agenda Cultural Guajiro-Arubiano, ehecuta entre 10 y 14 di december 2024 den cuadro di celebracion di 200 aña di e nomber Oranjestad. E Agenda Cultural ta resultado di e esfuersonan sistematico comparti di Fundacion Rancho, dirigi pa su presidente Clifford Rosa, den aliansa cu Fundación Compartamos la Felicidad, InspirARTE y Asociación Kojutajirawaa di Guajira, Colombia, cu cualnan a logra diseña varios evento cu tabatin como epicentro Ciudad di Oranjestad.
Atardi pa anochi di dia 10 di december, y presencia pa un publico cu a yena e sala, a tuma luga na Cas di Papiamento e evento Puentes de Cultura cu e conferencia ‘Transformaciones en los Roles de las Mujeres Wayuú’, un tematica di gran interes pa e personanan presente, kendenan a participa activamente na e discusion cu a surgi despues di e presentacion. E conocido linguista, maestro y investigado Ramon Todd Dandaré a dirigi e evento.
Celebrando cultura literario den e textonan di Gabriel García Márquez (Gabo) y exaltando feminismo den su obra, e prome conferencia literario a tuma luga na Biblioteca Nacional Aruba dia 11 di december. Cu e titulo ‘Feminismos en la obra de Gabo: Mujeres, Poder y Libertad desde la mirada del Nobel’a desaroya e espacio aki danki na sosten di Astrid Britten, directora di Biblioteca Nacional di Aruba y su tremendo team, dilanti di un publico numeroso y participativo, entre kendenan a destaca e periodista y escritor Benjamin Romero Barliza, como tambe e poeta, artista y escritor Arubiano Arturo Desimone y demas gestor cultural local presente.
Na Sede di Fundacion Rancho dia 12 di december a presenta e charla ‘Ana Magdalena Bach: Libertad y Empoderamiento Femenino (en En agosto nos vemos)’, den cual a expone algun reflexion riba e perspectiva di Gabo den su ultimo novela, publica postumamente na maart di e aña aki. Lansamento di e obra tabata na Barcelona, Spaña, door di e cas editorial Random House. Den e espacio aki Fundacion Rancho a otorga e orador invita pa cada un di e espacionan menciona, Maria Isabel Cabarcas Aguilar, un reconocemento, aludiendo na e contribucionnan cultural valioso na celebracion di e 200 aña di e nomber Oranjestad. E espacio aki a conta tambe cu presencia notabel di Sra. Xiomara Maduro, Minister di Finansa y Cultura, kende tambe a expresa su profundo admiracion pa e trabou di e escritor Nobel Colombiano.
Maria Isabel, kende a bin directamente di Riohacha, ademas di ta gestora cultural y academica, tambe ta Abogado (Universidad Santo Tomas) y Trahado Social (Universidad de La Guajira), Master den Cultura Huridico, Seguridad, Husticia y Derecho di Universidad de Girona, Spaña, y studiante di e Programa di Curso Intensivo valido pa Doctorado den Derecho di Universidad de Buenos Aires, Argentina. Cabarcas Aguilar ta liderando un causa social pa 10 aña pa medio di Fundación Compartamos la Felicidad, crea na 2015. Pa e impacto causa pa su trabounan a condecor’e como Mujer Cafam La Guajira na 2020.
Pa corona obra, durante su estadia na Ciudad di Oranjestad el a ricibi e grato noticia cu nan a scog’e como ganado di Premio Departamental de Cultura den e categoria Gestión Cultural, otorga pa Fondo Mixto para la Promocion de la Cultura y las Artes de La Guajira, lidera pa Larry Iguaran. E noticia a genera emocion y satisfaccion grandi bou di e comunidad insular cu a haci posibel realisacion di e agenda interesante y dinamico en cuestion.
Maria Isabel ta mama di Manuel Antonio de Jesús, kende a compañ’é riba e trayecto cultural y academico aki. Pa e Riohachera aki, docente, emprendedo social y columnista di opinion: ‘Esaki tabata un oportunidad precioso pa reitera nos reconocemento y cariño mutuo como pueblonan ruman, entre peninsula di La Guajira y isla di Aruba, pero principalmente den curason di nan hendenan, unda e deseo insaciabel ta biba pa sigui crea red di cultura, cu literatura oral y skirbi, arte, lenga, musica, identidad, historia y e raiznan comparti como protagonista. Danki na Fundacion Rancho su presidente y directiva pa genera e aliansa aki cu organisacionnan di La Guajira. Danki special na Gobernador di La Guajira, Jairo Aguilar, na gerente di ESEPGUA Andreina Garcia, na Capitol Consulting y su lider Francisco Mosquera, na Victor Deluque, Director di e Comunidadnan di Air-E y na Valentia Home cu e talento di Keren Marin, pa forma parti di e hazaña noble aki di integracion entre e teritorionan ruman separa y alabes uni pa Lama Caribe, den palabra di maestro Fredy Gonzalez Zubiria. Ainda tin un caminda largo pa cana y hopi esfuerso pa agrega na e anhelo comparti aki di integracion permanente.’
Pa finalisa e Agenda Cultural y e programa di aña 2024 di Fundacion Rancho, dia 14 di december a tene un anochi musical cu musica di Pasco di e agrupacionnan Estrellas del Barrio y Fortaleza den Bario di Rancho den curason di Playa. Eynan cuminda di Guajira tabata e protagonista, ya cu esun cu ta carga e tradicion, Jenny Quandt, Arubiano puro, a mustra su donnan culinario pa goso di e asistentenan. Cu ayaca, empana, friche, cabrito stoba, sopi di cabrito y otro delicianan esnan presente a sacia nan apetit, resaltando tambe e aros con pollo emblematico y exkisito di e tan stima Nana Todd, un cocinera Arubiano cu raiz Guajiro.
Cu musica, cuminda y e alegria caracteristico di Caribe e Agenda Cultural Guajiro-Arubiano aki a conclui exitosamente.
