Diabierna atardi un ploeg di Districto Oranjestad a organisa un Control Policial na e Districto di Oranjestad. E meta primordial di e control di trafico tabata enfoca riba diferente infraccion den trafico pero tambe e parti preventivo, pa asina crea mas concientisacion den trafico.
Ploeg di Oranjestad tabata compaña pa Motor Unit, Polis di Bario Oranjestad, Tourism Oriented Police, K9 Unit, CEA, Central di Polis, Departamento di informacion y como tambe takelwagen. Minister di Husticia sr. Arthur Dowers como tambe Hefe di Polis Uniforma Sr. De Mey como tambe Hefe di Districto Oranjestad Sr. Brown tambe tabata presente pa duna sosten na e agentenan policial cu tabata eherciendo nan trabou.
Na final di atardi e controlnan a sigui bay t’e den oranan di anochi na diferente localidad strategico den Oranjestad.
E accion Policial aki tabata fructifero y a resulta cu 350 vehiculo a wordo controla di cual tabata tin 93 boet reparti pa deferente infraccion manera:
Belasting, Rijbewijs, Safety belt, Seguro y Keuring. Tambe 3 vehiculo a wordo confisca. Durante control a bin encontra marihuana, cocaína, moli y sambechi. Tur esakinan a wordo tuma den beslag.
Un accion bon organisa cu no ta descarta cu lo tin mas na caminda. Na cualkier momento di dia nos agentenan policial por controla un vehiculo pa un trafico mas sigur na Aruba. Nos mensahe na nos comunidad ta pa Semper tin bo documentonan na ordo y Busca Bo Amigo Responsabel..
