Dialuna ultimo a tuma lugar e emocionante “Pitch Event” di Agri Business Academy (ABA), un iniciativa colabora entre Qredits Aruba y Gobierno di Aruba pa e sector agricola. E programa di ABA ta enfoca riba duna agricultornan, asina como personanan cu ta practica agricultura como hobby, e conocemento necesario pa cuminsa of amplia nan actividad agricola. E meta? Haci nan esfuersonan agricola mas sostenibel y factibel como negoshi, mientras cu ta eleva e cantidad di producto local.
Durante e curso, participantenan a ricibi guia personalisa pa desaroya un business plan robusto. Esaki a culmina cu un “Pitch Event”, caminda nan a presenta nan plan di negoshi pa por cualifica pa un financiamento na interes reduci, facilita pa Qredits Aruba. E participantenan tabata di diferente origen: algun ta tin negoshinan agricola ya den operacion, otro ta hopi entusiasma pa planta na un escala mas grandi, y tambe tin esnan cu ta duna consulta riba suela of ta diseña sistemanan agricola adapta na e necesidadnan di cliente.
Minister Geoffrey Wever, di Asuntonan Economico, tabata presente pa asisti e presentacionnan y a expresa su satisfaccion cu e progreso di e programa. Minister Wever a resalta cu financiamento ta regularmente un di e obstaculonan principal pa e sector agricola, y a destaca e importancia di un programa manera e Agri Business Academy cu por brinda un solucion realistico.
E vision di e ministerio ta cla: impulsando produccion local nos ta reduci dependencia di importacion y ta duna beneficionan substancial pa nos pais na un largo plazo. E programa di ABA ta un paso importante pa “boost” e industria agricola local, mientras cu ta crea mas sostenibilidad y oportunidadnan pa nos agricultornan.
Agri Business Academy ta prueba cu si ricibi guia corecto y e recurso financiero necesario, e sector agricola di Aruba por ta un pilar esencial den nos desaroyo economico y sostenibel.
“Mi kier a gradici Qredits Aruba, Ministerio di Naturalesa, y tur participante di e Agri Business Academy pa nan empeño, y ta desea tur agricultor e forsa y determinacion necesario pa sigui impulsa produccion local” – Minister Geoffrey Wever.
