ORANJESTAD, Aruba – 23 Augustus, 2023: Como un asociacion di dunador di trabao cu ta priorisa e sostenibilidad di Aruba su turismo y economia, Aruba Hotel and Tourism Association ta activa diferente iniciativa pa sostene e sector di enseñansa.
E siman aki, AHATA a haci un donacion di material nobo na Enseñansa pa Empleo (EPE) pa uso den e curso di Waiter y Waitress. AHATA ta den combersacion continuamente cu diferente skol den sector di hospitalidad pa identifica oportunidad pa colabora y contribui na e preparacion di e futuro forsa laboral. Den combersacion cu e directora interino di EPE, Sra. Sabine de Groot, y cu e Programma Coordinator HORECA di EPE, Sr. Francis Trimon, a sali na cla cu e curso ta haci falta di material pa set mesa y pa duna servicio di waiter y waitress. Presidente y CEO di AHATA, Sra. Tisa LaSorte, a pidi Sra. de Groot pa un lista di material cu ta desea pa eleva e curso, y e mesun dia a bai cumpra tur cos riba e lista pa regala EPE.
“Tabata un placer pa entrega e materialnan na EPE y cumpli cu un colaboracion productivo cu profesionalnan dedica den enseñansa”, Tisa LaSorte a indica, “AHATA y EPE tin e vision comun cu cada persona cu ta siña con pa duna servicio di calidad y cu orguyo, ta yuda Aruba su turismo bai dilanti.”
Francis Trimon a keda contento cu e donacion y a expresa cu e ta sinti un motivacion nobo como maestro di e curso.
AHATA lo sigui su colaboracion positivo cu EPE pa beneficia e programa cu ta dedica na ofrece cursonan basa riba necesidad di mercado laboral, na nivel alcansabel pa tur hende.
