Aruba Hotel & Tourism Association (AHATA) a haci un donacion di 52 set di cuchiu profesional di ASD Aruba na studiantenan di prome aña di e programa culinario di EPI HORECA. Adicionalmente, e alumnonan a ricibi t-shirt di AHATA su campaña “Ami Ta Turismo”.
Sra. Vanessa Rasmussen, Manager of Member Services and Administration di AHATA, a entrega e donacion den presencia di e alumnonan y facultad di EPI HORECA. Como representante di e asociacion, Sra. Rasmussen a enfatisa con e hermentnan ta mas cu un intrumento culinario, e ta representa e prome paso den e futuro carera di e hobennan.
Como un organisacion di dunador di trabou cu ta traha pa e sostenibilidad di Aruba su economia y turismo, e asociacion ta traha activamente riba diferente inicitivanan cu ta apoya e sector di enseñansa, pa asina yuda sera e “gap” entre educacion y nos mercado laboral.
AHATA ta felicita e studiantenan pa tuma e paso importante aki den nan formacion profesional y ta duna nan un cordial bon bini den e industria culinario y turistico. Cu e donacion di e hermentnan di calidad halto aki, e asociacion no solamente ta inverti den nos talentonan local, pero ta spera di inspira mas hoben pa continua nan carera y ambicion den e mundo di gastronomia cu gran motivacion y dedicacion.
