Diamars merdia, lider di POR, Sr. Alan Howell a yama un rueda di prensa den pura, pa asina duna su banda di medaya riba e acusacionnan fuerte cu tin den su contra, su partido y su fundacion Fraktie POR den parlamento.
El’a bisa: Un rato pasa a haya un carta di Openbare Ministerie unda nan ta informa di lo bay hasi un investigacion relaciona cu “fraktie geld”. Nos no a haya mucho destayes, di kico e investigacion lo bay ta, pero den medio di comunicacion nos a bin compronde cu tin di haber cu MOT. MOT tin di haber cu transacacionnan. Nos mester laga e investigacion saca afor.
Na momento cu esnan cu ta encarga cu administratie, si nan wordo yama, nan lo mester contesta.
Kico ta Fraktie Geld? Tur fraccion ta haya cierto suma pa traha cune, pa yuda e fraccion cu loke ta necesario. E carta cu nan a entrega nos, no ta poni kico ta punto cardinal. Den prensa si ta wordo menciona MOT. MOT ta hopi skerpi cu transaccionnan y ora nan mira cu e transaccion ta irregular, nan por haci investigacion.
Alan Howel a sigui bisa cu e no tin ningun conocimento di ningun clase irregularidad y tin cu laga MOT y esnan cu ta bezig, haci nan trabao. Despues lo tende si mester bay duna cualkier cuenta. Mi ta president di e bestuur, e fundacion tin su tesorero y tambe su accounting. Nos ta para habri pa contesta tur pregunta.
Mi no ta bay mucho den detayes, mi ta bay laga e investigacion mustra. Nos abogado cu ta representa e stichting, lo bay contact Ministerio Publico pa asina check ta kico nan a mira o ta kico nan kier mira como irregularidad.
E ta posibel cu na momento, cierto pagonan a bay na cierto caminda, cu MOT por detecta esaki como algo alarmante y por haci investigacion riba dje.
Na momento cu haya mas detayes, lo bin splica si tin mas acontesimiento rond di esaki. Tur onderzoek cu tin ta fastioso pa e partido riba su mes, pero si bo no tin nada, bo tin cu keda rustig y laga MOT haci nan trabao y e parti administrativo, lo sa con pa contesta e detayenan aki. Ta trata di Stichting Hunto nos Por.
