Ta tristo pa bisa, pero ta parce cu mescos cu nos ta den temporada halto di turismo, nos ta den temporada halto di uso di alcohol, y no tin distincion, entre hende grandi, hoben, y hasta mucha.
Awor e pregunta ta bini : Kico tin mas balor den bida di hende, Alcohol, bo famia, bo matrimonio, bo cas, bo trabao, bo integridad?
Pensa un rato bon y wak e posicion cu alcohol a alcansa den bida di hende, pasobra si tur dia un hende tin cu bebe, e ta esclavo di alcohol, of alcohol ta su Dios.
Pasobra locual ta domina bo mente, ta domina bo bida, pasobra e tin control riba tur locual bo ta haci.
Usamento di alcohol ta contra palabra y boluntad di Dios pasobra Bijbel ta bisa hopi cla den Galationan 5:19-21 cu buracheria lo no drenta reino di Dios.
Antes un muhe burachi tabata un cos di berguensa, pero awor e ta parce un arte, un parti di gran alegria, ta manera comunidad a lubida decensia, ta facil pa bo mira un dama burachi.
Un homber burachi tabata wordo califica como un payaso, pero awor a bira facil pa bo sinti olor di alcohol tur momento, den dia, atardi, merdia, y hasta bao di ora di trabao.
Awor no ta existi un ley cu ta stop hende di bebe, pero tene cuenta cuanto accidente, cuanto morto, cuanto hende tin cu problema fisico despues di accidente burachi cu nan mes a causa, of pa motibo di accidente causa door di hende burachi nan bida a cambia por completo.
Cuanto hende no tin un bida traumatisa , pa motibo di alcohol, cuanto hende no a perde, cas, famia, matrimonio, trabao, posicion , pa motibo di alcohol.
Cuanto hoben no ta adicto na alcohol?
Awor nos ta den temporada di Carnaval cual ta e unico fiesta cu bo mester ta burachi pa bo gosa,esey ta un gran mentira pasobra hende burachi no por gosa di nada.
Anja aden anja afo tin hende ta sostene caha di gobierno pasobra nan tin cu paga boetnan halto pa nan libertad, y hasta tin biaha hunto cune sinti klop di polis, y trato fuerte pasobra nan ta burachi.
Ta kico mas mester sosode pa wowo di hende por habri?
No por ta agradabel den bista di Dios, ora un hende ta burachi, pasobra e palabra di Dios ta bisa cu nos curpa ta tempel di Dios y e Spirito Santo ta biba den nos.
Ken tin ay? Ken tin verdriet?Ken tin pleito?Ken tin keho?Esnan cu ta sinta ora nan largo cu binja,esnan cu ta bay pa purba binja mescla.( Proverbionan 23:29-30) ta papia di bebemento y su consecuencia, pero awor nos ta den un tempo cu hende ta bebe y ta causa danjo na otro hende, y na comunidad, cual ta algo hopi doloroso,pa tur dos banda.
Den Genesis 9:20-26 Noe a pasa den berguensa door di bebemento, y den Genesis 20:30-38 ta para scirbi con alcohol a hiba Lot na inmoralidad.( Incest).
Laga nos comporta nos mes,decentemente manera den dia,no den parandiamento,y den buracheria,no den inmoralidad sexual, y den sensualidad,no den pleito y envidia. Ma bisti boso cu Senjor Hesus Cristo, y no haci provision pa e carni,pa cumpli cu su mal deseonan. ( Romanonan 13:13).
Na prome lugar tur hende mester tene cuenta cu nan mes ora nan ta bebe, pa nan no causa danjo na nan mes y na otro hende,no causa dolor na nan famia, y perde respet, y danja relacion y amistad.
Corda pone Cristo Hesus na prome lugar den bo bida, den dj’E tin goso.
Sinceramente, Pastor Marcel Balootje
