Medio yüni NWO ta organisá e di dos edishon di Siman di Investigashon Karibense. Edukashon i traspaso di konosementu ta hunga un ròl importante. Investigadónan prosedente di región di Karibe òf esnan ku ta hasi investigashon den e region aki, lo duna tayernan pa alumnonan di skol sekundario e simannan promé ku e evento.
Lo ofresé e tayernan aki tantu na algun skol na Hulanda komo skolnan na Aruba, Boneiru, Kòrsou, Saba, Sint Eustatius i Sint Maarten.
E seri di tayer aki na skol sekundario ta hasi e hóbennan konsiente di balor di siensia den nos komunidat. Pasobra, dikon hasi investigashon ta asina importante i kiko un investigadó ta hasi tur dia? Ki tipo di profeshon ta kuadra ku esaki i kon bo por haña un funshon asina?
E temanan ku ta bini dilanti den e tayernan ta hopi diverso. Ta motivá e hóbennan espesialmente pa hasi e investigadónan hopi pregunta i hasi tareanan kòrtiku na e sitio ei mes. Preguntanan ku lo trata ta por ehèmpel: Kon ekonomia di un ‘small island state’ manera Kòrsou òf Saba ta funshoná? Kiko eksaktamente ta kolekshon di data i komo tarea: diseñá un enkuesta propio. Kiko ta e relashon entre alimento i sostenibilidat i kon abo por mantené bo ‘carbon footprint’ mas chikí posibel? Di e manera aki nan ta enbolbí e hóbennan den e programa ku ta dirigí riba kompartí konosementu i formashon di ret di kontakto.
Tammy-Sue Lejuez, alumno di HAVO 4 – Colegio Nigel Matthew, Aruba:
“Hasi mas eskoho responsabel. Pensa riba loke bo ta kome i kon esei ta oumentá bo ‘footprint’.”
Amber van Veghel, investigadó di Alimento i Kambio di Klima na Universidat di Aruba:
“Mi a haña sumamente agradabel pa hiba kòmbersashon ku e muchanan tokante alimento. Nos a papia tokante kultura i kustumber alimentisio. Mi tambe a siña hopi di e alumnonan. Asina un grupo a deskubrí ku na algun plantashon di koko tin roi kobá ku tin awa aden, di manera ku e koko ta kai suave den awa i no duru riba tera.”
Programa Siman di Investigashon Karibense (13-17 yüni): https://www.nwo.nl/bijeenkomsten/week-van-het-caribisch-onderzoek
For di komienso di e programa karibense NWO a organisá tres ronda di finansiamentu. Esaki a duna investigashon sientífiko na i den Karibe hulandes un impulso fuerte. Bo por haña mas informashon tokante e aktividatnan i produkshon riba e página di e programa.
