Mas di 90% di Venezolano cu a sali for di Venezuela, lo bay bek Venezuela. Nan kier un Venezuela liber y na paz.
Ta pa e motibo aki mes diasabra, 12 di december, nan lo tin un consulta popular na diferente punto di e isla.
Ta apela pa tur Venezolano riba e isla participa den esaki, sin importa nan estado aki na Aruba.
Desde dia 7 di december ta disponibel caba un aplicacion “telegram” unda por participa den e consulta popular of por haci esaki personalmente dia 12 di december for di 10’or di mainta te cu 5’or di atardi.
E consulta ta consisti di tres pregunta unda cu e democratanan cu no kier e dictadura na Venezuela por contesta segun loke nan ta sinti. E Venezolanonan cu a vota caba por medio di “Telegram”, por acudi na e convocatorio y firma e lista dunando e codigo cu a haya for di e aplicacion “Telegram” ora cu a contesta e preguntanan.
Luis Zárraga, representante di e Convocatorio “Alza la voz contra Maduro”, a splica cu e convocatorio ta mas huridico cu politico, pasobra e ta bin di e ciudadania, y no di ningun partido di Asamblea Nacional.
E convocatorio ta bin di diferente facultadnan di derecho di universidadnan di Venezuela. E rectornan a reuni y a pidi conseha na mundo pa mira con por logra yega na un comprondemento y sali di e Dictadura, pasobra mester tene na cuenta cu dia 5 di januari awo, e Asamblea nacional mester entrega na otro Asamblea Diputadonan elegi, si nan a wordo eligi di berdad den un eleccion legal, autentico,cu por mira cu no tabatin cosnan ilegal.
E Asamblea Nacional actual, di presidente interino Juan Guaidó, ta legal. “Esun cu a tuma luga dia 6 di december tabata un robo, esey no ta existi, of no mester existi pasobra el a wordo crea door di Conseho Nacional Electoral, imponi door di e Dictadura, y danki na Corte Supremo di Husticia. Pues e tresnan aki no ta existi huridicamente, y pa e motibo aki no a haya apoyo di por lo menos 50 pais. Den e ultimo eleccion, solamente 6% di e poblacion a sali vota,” e activista Venezolano Luis Zárraga a comenta.
Pa mas informacion por tuma contacto cu: 5936096, 7433875 of 5633313.
E centronan di consulta popular pa dia 12 di december na Aruba, ta ubica na e siguiente localidadnan: Berloni (Noord), Bochincha (Oranjestad), Chocoglam (Noord), Caribbean Print (Noord), Frutería Paradera (Paradera), Lenin (Noord), Masago Aruba (Oranjestad), Tia Rosa Snacks (Pos Chikito), Residencias Don Vicente (Oranjestad), Rubio Trading (Pontón), Shocco Snack (Pos Abau).
