Bon bini bek na nos column, mi nomber ta Dasha y mi ta un boticario na Botica di Servicio. Dia 21 di September ta Dia Mundial di Alzheimer. Alzheimer ta un malesa cu ta drenta keto y poco poco den bida di un hende. E ta cuminsa cu cosnan chikito mane lubida unda bo a pone bo skeiro di cabey, of lubida un sita cu tabata importante. Poco poco e malesa ta bira mas presente den e persona su bida, te ora cu un hende no ta por reconoce su mes of e personanan mas serca di dje. Esaki ta un proceso cu ta trece hopi tristesa y frustracion, no solamente pa e pashent, sino pa tur hende cu ta serca di dje.
Na botica nos ta un di e lugarnan caminda e señal nan ta bira cada bes mas y mas visibel. Personanan cu ta bini dos of tres biaha den un siman pa busca e mesun receta, of cu ta puntra hopi biaha con nan mester tuma un remedi cu nan ta tumando pa hopi aña caba. Hopi biaha ta e persona su pareha of un yiu cu ta cuminsa bisa nos: “Mi mama/tata ta lubida tur cos.”
Tin remedi nan pa Alzheimer, pero nan ta limita. Remedinan manera Rivastigmine te cu ainda no por cura e malesa, pero nan por yuda baha e velocidad di progresion di e malesa of nan por mehora e sintomanan mane concentration of comunicacion. Aki ta caminda botica por yuda: nos ta wak si e forma di remedi ta pas pa e pashent. Esaki ta no solamente incera controla si e efecto di e remedi ta surpasa e efectonan secundario manera problemanan di stoma, biramento di cabes of ansiedad pero tambe si e forma di e remedi (capsula of pleister) ta pas den un persona su dia diario.
Un otro reto grandi ta therapietrouw: tuma remedi tur dia na ora cu mester. Ora e memoria ta fayando e persona, esaki ta un obstaculo hopi grandi. Nos por yuda cu rol di medicina (si ta tuma capsula/tabletanan, nos ta pone esaki den saco chikito pa cada momento cu mester tuma un remedi), cu alarma den telefon, of cu recordatorio manera email pa indica cu un receta ta cla pa bin busca na botica. Esakinan ta zona mane cosnan chikito, pero nan ta haci un gran diferencia den e bida di e pashent y tambe den e bida di e cuidadonan.
Alzheimer no ta solamente un malesa di e pashent mes pero e ta un malesa carga door di e famia, di e pareha, y tur otro persona den su bida. Mantelzorgers (cuidadonan) ta carga hopi peso. Nan ta haci tur cos cu amor, pero hopi biaha cu lagrima, cansancio y e sintimento cu nan ta perdiendo e persona cu nan ta stima tiki tiki. Pa nos na botica, nos ta purba di baha e peso un tiki: cu un conseho simpel, cu oido, pero tambe simplemente door di mustra pasenshi y comprension di e situacion como e pareha di cuido!
Luna di September ta luna di aprecio na Botica di Servicio! Nos kier duna tur nos miembro nan un gran “MASHA DANKI!” pa bo confiansa den nos. Tur siman bo tin chens di gana premio na un di nos 4 botica nan. Nos ta kere den e miho cuido, nos ta kere den comunidad – y mas cu tur cos, nos ta kere den bo.
