Den e ultimo weekend, un delegacion di amazona di Aruba a competi den e Valida Clasificatoria organisa pa ASOCABA na Medellin, Colombia.
E amazonas cu a representa Aruba ta Zaria de Groot den categoria di Infantil A 9-11 anja, Mia Rose Tromp den categoria Junior A 12-14 anja, Xielle Koolman, Abigail Wong y Xyselle Dijkhoff den categoria Juvenil A 15-17 anja. Akinan Xyselle a clasifica den e top 8, pero a keda net cortico pa un di e 6 premionan. Sarah Toet a competi den categoria Aficionadas 1 A caminda e la obtene un tercer puesto. Genesis Pietersz a competi den categoria Aficionadas 2 A unda e la logra un cuarto puesto, y Lea Vink a competi den Aficionadas 3 A caminda e la keda premio cu un tercer puesto.
Casi tur amazona a competi riba cabaynan cu nan no ta conose, cual a hasi nan resultado mas impresionante y ta demonstra nan habilidad pa adapta na cualkier tipo di cabay cu nan hanja.
E amazonas lo ta kedando Colombia algun dia mas pa asina participa tambe den un trainingskamp pa sigi desarolla nan habilidad y hanja mas experiencia.
