Directie Natuur & Milieu (DNM), hunto cu Aruba Conservation Foundation (ACF) y Blue Marine Foundation (BMF), a presenta na Ministerio un update tocante e progreso den e proceso 30×30, enfoca riba proteccion di ambiente marino di Aruba. Esaki den preparacion pa e proximo ronda di dialogo y consulta cu stakeholders, cu lo tuma luga den luna di october binidero.
E presentacion ta sigui riba e prome fase di e proceso cu a inicia na comienso di aña. Despues di un prome ronda di consulta, e grupo di trabou a dedica e siguiente lunanan na trabou tecnico, recopilacion y analisis di informacion, preparacion di mapanan y desaroyo di diferente senario.
E siguiente paso ta pa bolbe cerca stakeholders relaciona cu ambiente y actividad marino, e biaha aki pa presenta e resultadonan di e trabou tecnico y haya nan feedback riba e diferente senarionan cu ta bou consideracion.
Director di DNM, Gisbert Boekhoudt, a splica cu e proyecto a inicia na februari y cu e reunion cu Prome Minister Eman a sirbi pa brinda un update di e progreso logra te awo.
Como parti di e proceso, DNM y su partnernan a traha cu informacion disponibel tocante naturalesa y uzo di e areanan marino. A base di e informacion aki, nan a prepara diferente mapanan y senarionan pa evalua con Aruba por acerca e meta internacional di 30×30.
E proceso ta considera tanto awa teritorial como e area offshore, incluyendo e zona economico exclusivo, y ta explora diferente senarionan relaciona cu e meta di proteccion di mas cu 30 porciento di ambiente marino pa 2030.
Boekhoudt a enfatisa cu e proceso actual ta un proceso di investigacion participativo y consultativo. E informacion cientifico disponibel, e trabou tecnico y e aporte di stakeholders ta reuni y analisa pa crea un base solido pa e siguiente pasonan.
Esaki ta importante, pasobra e proceso actual no ta parti di un ley cu ya ta defini. Al contrario, consulta y investigacion ta tumando luga prome, pa cu eventual legislacion por wordo desaroya riba base di evidencia cientifico y teniendo cuenta cu e informacion y feedback cu stakeholders ta aporta.
Proteccion di bida marino
Pa Natasha Silva, Chief Conservation Officer di Aruba Conservation Foundation, e proceso ta importante mirando e balor cu naturalesa marino tin pa Aruba.
Silva a indica cu diferente pais rond mundo ta trahando riba e meta 30×30, tanto riba tereno como den ambiente marino. Den caso di e proceso actual na Aruba, un parti importante di e atencion ta bay pa e area offshore.
Segun Silva, proteccion di e ambiente marino ta importante pa preservacion di bida marino y naturalesa en general. E ta mira tambe un conexion directo cu economia di Aruba, considerando cu e ambiente marino ta forma parti di e recurso natural cu ta sostene diferente actividad economico.
Silva a señala ademas cu, bou condicionnan adecuado di proteccion, ambiente marino tin potencial pa recupera y genera beneficio tanto pa naturalesa como pa Aruba den sentido mas amplio.
Sosten tecnico, ciencia y investigacion
Fiona Newell di Blue Marine Foundation a destaca e colaboracion cu DNM y ACF y e oportunidad pa BMF contribui cu su experiencia internacional den proteccion di oceano.
Newell a indica cu Blue Marine Foundation ta mira potencial den e proceso cu Aruba ta siguiendo y cu nan rol ta principalmente pa sostene DNM cu conocimiento tecnico unda esaki ta necesario.
E aporte di BMF ta concentra specialmente riba proteccion di oceano, ciencia y investigacion, complementando e conocemento y experiencia local di DNM y ACF.
Proximo paso: stakeholders ta haya oportunidad pa otro ronda di dialogo
Participacion di stakeholders ta un elemento central den e proceso. Despues di e prome ronda di consulta y e trabou tecnico cu a sigui, e intencion ta awo pa presenta e informacion y senarionan desaroya na stakeholders relaciona cu ambiente y actividadnan marino.
Durante e siguiente ronda di dialogo, stakeholders lo haya oportunidad pa evalua e senarionan y brinda nan feedback. Asina, nan aporte, hunto cu e evidencia cientifico y investigacion tecnico, por forma parti di e base riba cual e siguiente pasonan lo wordo desaroya.
E presentacion na Prome Minister Mike Eman ta marca asina un siguiente paso den e proceso: for di consulta inicial, pa analisis tecnico y desaroyo di senarionan, y awo bek cerca stakeholders pa un siguiente ronda di dialogo.
Unabes e fase di investigacion y consulta conclui, e informacion recopila por sirbi como base pa desaroyo di eventual legislacion. Si den un fase posterior un area haya proteccion legal, lo sigui un otro proceso di consulta cu stakeholders tocante maneho di e area.
Cu e proximo ronda di consulta programa pa october, DNM, ACF y BMF ta sigui cu un proceso basa riba investigacion, evidencia cientifico y participacion di stakeholders, pa explora con Aruba por duna contenido na e meta 30×30 pa su ambiente marino.
