Esaki ta dos flecha cu e enemigo ta usa pa miles di anja pa destrui amistad, famia, matrimonio, trece gera entre paisnan, den un palabra bisa trece desunion y division,
Redo: Ta algo cu ta wordo papia of haci tras di lomba di hende, algo cu no por wordo bisa den cara di un persona, cual mayoria biaha, ta un mentira of algo cu a wordo confia, pero cu awor ta wordo plama riba caya cu e fin di halsa aki banda y kibra aya banda.
Falsedad: Ta algo cu ta wordo bisa den cara di e persona, cu e fin di pone sinti su mes bon, cu ta pone e persona kere den un amistad cu no ta existi, pasobra locual e boca ta papia, no ta sali di curason.
Ta mescos cu manera bisa un persona bay haci algo, mi ta cu bo, y ora e kere esey e ta hanje para su so.
Tin hopi violencia, desunion, division y hasta morto ta cay pa motibo di redo y falsedad,
Na prome lugar ningun di nan dos ta bini di Dios, pasobra tur dos ta un mentira, y nos tur sa cu diabel ta tata di mentira.
Cristo Hesus ta e caminda di e berdad y e bida, e diabel solamente a bini pa horta mata y destrui, e no tin amor pa nada ni pa ningun hende.
Pa motibo di redo y falsedad tin problema den hopi famia, den negoshi, den hopi organisacion, y hasta den cas di Dios tin hende no kier bay pa motibo di redo y falsedad.
Redo y falsedad ta un arma, flecha of veneno cu e enemigo ta usa hasta den e yiunan di Dios, pa asina trece desacuerdo, pasobra caminda tin redo, falsedad y falta di confiansa no por tin union den oracion.
Bao di nos hubentud tambe e asunto aki, ta bayendo for di man, hopi pelea, cu ta tuma lugar, ta pa motibo di redo y falsedad, ta cuenta cu e di, cu nan di, su esaki ta frei esaki, esaki ta cu e saya, y na final ningun hende sa kico a pasa, pa cual motibo nan ta haci danjo na otro.
Redo y Falsedad ta dos spirito malo, cu mester reprende for di principio, pasobra tur dos ta pica, redo y falsedad ta kita pas di Dios, y Dios ta odia cosnan cu ta trece desunion entre ruman. ( Proverbionan 6:16-19).
Un hende perverso ta sembra pleito, y un hacido di redo ta separa amigonan intimo.( Proverbionan 16:28).
Esun cu ta cana haci redo,ta saca secreto,pesey, no asosia cu esun cu tin lenga los.( Proverbionan 20:19).
Un lenga mentiroso ta odia esnan cu e ta lastima,y un boca cu ta labia ta obra ruina.( Proverbionan 26:28).
Hende cu ta haci redo, ta halsa maldad, y hende falso ta sirbido di e maligno, laga nos no lubida con e diabel a drenta Hudas Iscariot y di eynan e a cuminsa busca forma pa bende Hesus.( Mateo 26:14 y Lucas 22:3-6).
Pesey den nos hogar, nos mester tin Cristo Hesus na prome lugar y E mester ocupa e prome lugar den nos curason.
No laga redo y falsedad bira un custumber, pero corta cu e cosnan ey asina cu nan cuminsa, y no particpa den nan pasobra tur dos ta obra di scuridad.
Educa nos yuinan bon pa ora cu nan bay scol no cay den e trampa ey, no papia riba ningun hende,mantene pas y bon amistad cu tur hende.
Laga e pas di Dios, goberna bo bida, cas y famia,laga amor goberna tur momento.
Sinceramente, Pastor Marcel Balootje
