Djis tene esaki bon na cuenta:
Con por tin mayor ta bisa nan yiu cu nan stima e yiu y ningun ora no tin tempo pa e mucha?
.
Con un homber ta bisa cu e ta stima un muher y e ta maltrata e muher tanto verbal como fisico?
.
Con un homber por ta bisa cu e ta stima su famia pero e no ta cria su yuinan?
.
Con un mama por saca su yiu mande bay biba serca su wela pa e hinca homber den cas y e ta bisa cu e ta stima su yiu?
.
Con un tata por ninga di reconoce un yiu na chikito y na grandi e ta bisa cu e ta stima su yiu?
.
Con un hende por laga su yiunan sin come henter dia , pero dilanti di hende e ta bisa cu e ta haci tur cos pa su yiunan?
Con un hende por viola of abusa sexualmente di su propio yiu?
Con un hende por sinja su yiu bebe y usa droga?
Ta ki tipo di amor ta esun cu ta sconde cos horta pa un yiu?
Ta ki tipo di amor ta esun cu sa cu bo yiu ta cana cu arma di candela, pero bo no ta haci nada pa stop esey?
Ta ki tipo di amor di mayor ta esun cu ta fia yiu menor di edad auto,pa bay fiesta cu amigonan sabiendo cu esey ta contra tur ley?
Ta ki sorto di amor ta esun cu ta sinja un yiu pa no bisa su tata cu su mama tin un byside of vice versa?
Con por tin mayor cu no ta interesa pa nan yiu tin Cristo Hesus den nan bida, pero toch nan kier pa nan yiu ta drechi y integro?
Amor no ta palabra so, e ta guia y gran responsabilidad.
1 Juan 3:18 ta bisa: Yui chikitonan no laga nos cu palabra ni cu lenga ma cu hecho y berdad.
1 Juan 4;10-11 ta bisa: Den esaki amor ta consisti, no cu ta nos a stima Dios, ma cu ta E a stima nos y a manda su Yiu pa ta e redentor pa nos picanan, Stimanan si Dios a stima nos asina tanto, nos tambe mester stima otro.
Nos ta yama pa cana den amor, nos ta yama pa stima otro.
Laga amor ta sin hipocrecia, Aborese loke ta malo, tene firme na loke ta bon.( Romanonan 12:9).
Ademas di tur e cosnan aki bisti amor, cual ta e laso perfecto di unidad.( Colosensenan 3:14).
Ma e proposito di nos instruccion ta, amor for di un curason puro y un bon consenshi y un fe sincero.
Awendia hopi hoben ta kere cu amor ta nifica relacion sexual, asina nan ta cay den trampa di malbadonan, cu ta probecha di nan bao di enganjo di amor.
Amor ta algo decente y puro, amor sa di respeta su mes y otro nan, amor berdadero ta trece orden y orden ta di Dios.
Caminda tin desencia tin amor, pasobra Dios ta amor, y caminda Dios ta, berdad ta prevalese, y puresa ta aumenta.
Tur locual hende sembra nan ta cosecha, si bo sembra mentira bo ta cosecha berguensa, si bo sembra amor bo ta cosecha pas y dignidad.
Pero ningun hende no kere cu nan por haci bofon di Dios, pasobra esun cu sembra den Spirito lo cosecha bida eterna , ma esun cu sembra den carni lo cosecha corupcion.
Stima cu un curason berdadero, no ganja ningun hende, tampoco probecha di noblesa di hende.
Dios ta amor.
Sinceramente, Pastor Marcel Balootje
