Tin hopi hende ta stima di boca pafo, nan ta papia hopi , pero e amor no ta sali di curason.
Tin hopi tipo di amor:
Amor Pasahero,
Amor Financiero,
Amor Parandero,
Amor temporal,
Amor interesado,
Amor apasiona,
Amor abusador,
Amor probechado, y hopi tipo mas di Amor, pero solamente den Cristo Hesus nos tin Amor Eterno.
E amor di Dios pa nos nunca ta cambia, semper e ta mesun cos 24/7, e no ta fria, e no ta lubida, e ta pordona, e ta aumenta, cada dia mas y mas, grandi ta e amor di Dios.
Pasobra Dios a stima mundo asina tanto cu E a duna su Yiu unigenito pa ken cu kere den dj’E no bay perdi ma tin bida eterna; ( Juan 3:16).
Ningun hende tin un amor mas grandi cu esaki, cu un hende ta duna su bida pa su amigonan.( Juan 15;13).
E amor di Dios ta maraviyoso, e ta sublime, e ta fuerte, e ta fiel, e ta yen di misericordia, e ta trece speransa, e ta aumenta nos fe, e ta sinja nos stima, e ta sinja nos balora locual nos tin , y ta duna nos un bida nobo, e ta trece cambio, e ta semper cu nos.
Ora nos mira con hende ta trata otro malo, traiciona otro, rebaha otro, wanta rabia contra otro, haci tur manera pa kibra bida di otro, e ora ey nos tin cu componde cu tur esey ta bini di falta di amor.
Ora un persona ta bandona su cas caminda nan ta stime, y bay biba na otro cas, caminda nan ta stime pa locual cu e tin, y awor no ta mantene su famia, nos sa cu eynan falta di amor ta presente.
Amor berdadero no ta papia mentira cu otro, amor verdadero semper tin tempo pa otro, amor berdadero ta bini directamente di Dios, pasobra Dios ta amor.
Amor no ta busca su propio interes, amor tur dia ta mesun cos, amor berdadero no ta desconfia, pero ta alegra, y ta biba cada momento.
Amor no ta materialista, amor no ta busca su propio interes, pero e ta corda riba necesidad di otro, e por sinti e dolor pa otro, y sali na nan defensa.
Amor no ta cana den scuridad, ni tampoco ta biba den inmoralidad, amor no tin goso den falsedad, ni tampoco ta biba den pasado di otro hende, amor no ta envidia, tira cos na cara di otro, pero amor ta stima, pa nan tambe wordo stima.
No stima mundo, ni e cosnan di mundo,Si un hende ta stima mundo , e amor di e Tata no ta den dje. Pasobra tur loke tin den mundo, e deseo di carni, y e deseo di wowo, y e orguyo di bida, no ta bin di e tata, sino di e mundo.( 1 Juan 2:15-16).
Hende mester sinja reconoce, pasion perverso for di amor berdadero, pasobra tur locual ta perversidad, y impuresa y cosnan cu ta bay contra naturalesa di Dios , no ta bini di Dios, sino di e diabel, cu ta manipula, y danja e mente humano.
Nos ta stima pasobra E a stima nos prome. Si un hende bisa: Mi ta stima Dios, y ta odia su ruman, e ta un ganjando, pasobra esun cu no ta stima su ruman cu e amira, no por stima Dios, Kende e no a mira.( Juan 4:19).
Sea alerta, para firme den fe,actua manera homber, sea fuerte. Laga tur loke boso haci wordo haci e amor.( 1 Corintionan 16: 14).
Amor tin un nomber: Cristo Hesus. Sinceramente, Pastor Marcel Balootje
