E ta keda masha mahos ora tin falta di respet den un hogar, ora yui no ta respeta mayor ni tampoco mayor ta respeta yiu. No ta boluntad di Dios, pasobra Dios ta stima union den cada cas di Famia. ( Salmo 133).
No ta algo di broma cune, ora un yiu ta halsa bos pa su mayornan, y bo ta tende e mucha ta malcria, pasobra malcriansa ta bini door di descuido di mayor , ora mayor ta neglisha nan autoridad, ora mayor no tin tempo pa educa su yiu, tampoco pone displina, esey ta e causa di malcriansa.
Y malcriansa ta cuminsa den cas, y si e no wordo controla e ta bira rebeldia, y rebeldia no tin limite, pasobra rebeldia lo demostra su mes tur caminda, riba caya, na scol, y hasta den cas di Dios, pasobra rebeldia ta spiritual, pasobra e tin un mal spirito ta obra rond di dje.
Ta boluntad di Dios, pa den tur cas por tin amor y respet, pasobra eynan tambe lo tin pas, y oracion y alabansa por tuma lugar sin ningun estorbo.
Mayor ta e prome mentor di nan yuinan, teniendo na cuenta, cu responsabilidad di mayor ta un yamado di Dios, y cu enfasis mester wordo poni, pasobra Dios ta bisa mayornan pa lanta nan yiunan den e disiplina di Señor.( Efesionan 6:4).
Mayor mester ta masha conciente locual e palabra di Dios ta bisa; Mihor un tayo di berdura caminda tin amor,cu un toro gorda, y odio hunto cune.( Proverbionan 15:17).
E asunto di ta laga material dirigi famia, caminda hende su bista ta dirigi mas riba placa, auto y tur locual ta herencia ,hopi biaha ta trece division y e amor berdadero cu mester resplandece den cas di famia no tey.
Esun cu ta confia den su rikesa lo cay, ma e husto lo florece manera blachi berde.(Proverbionan 11:28).
Esun cu tormenta su mes cas,lo hereda biento,y e bobo lo ta sirbido di esun cu ta sabi di curason.(Proverbionan 11:29).
Un hende cu ta trece desorden den su propio cas, pa medio di buracheria,parandiamento, uso di droga y alcohol, adulterio, inmoralidad etc, no ta stima su famia, tampoco ta stima Dios. Pasobra e palabra di Dios ta bisa lo siguiente: Si un hende bisa: Mi ta stima Dios, y ta odia su ruman, e ta un gañado,pasobra esun cu no ta stima su ruman cu e a mira,no por stima Dios, kende e no a mira.Esun cu ta stima Dios, mester stima su ruman.( 1 Juan 20-21).
Laga nos papia cu tur claridad posibel , un hende cu ta trata su famia , malo especialmente cu abuso verbal, violencia domestico, adulterio, inmoralidad etc, su relacion cu Dios ta kibra.
E palabra di Dios ta bisa: Mas si un hende no provee pa su mes hendenan, y specialmente pa esnan di su cas, e a nenga fe y ta pio cu un incredulo.( 1 Timoteo 5:8).
Como mayor nos tur tin e deber sagrado,di cria nos yuinan.
Tur hoben mester tene cuenta cu locual a palabra di Dios ta bisa: Honra bo tata y bo mama, pa tur cos bay bon cu bo y lo bo tin bida largo riba tera. ( Efesionan 6:1-2)
Mi yiu warda e mandamento di bo tata. Y no bandona siñansa di bo mama,y mara nan continuamente riba bo curason, mara nan rond di bo garganta, Ora bo ta riba caminda nan lo guia bo.Pasobra e mandamento ta un lampi, y e siñansa ta lus, y e reprendemento di disiplina ta e caminda di bida.(Proverbionan 6:20-23).
Sinceramente Pastor Marcel Balootje
