Recientemente abogado Delo Gomez a skirbi un analisis riba e caso di Endy Croes vs Ernst & Young. Nos a studia e contenido, y loke ta sali na claridad ta cu nos ta deal cu un piesa mas di propaganda politico vs. un analisis legal serio. E comparacion cu e ta hasi entre diferente caso ta mustra un falta di seriedad profesional cu ta preocupante pa e abogado su nivel.
E Comparacion Problematico: Appel cu Peer
E articulo di Delo Gomez ta intenta crea un narrativa falso cu Endy Croes a wordo haya cu “mesun comportacion di shouro”. Pero esaki ta un comparacion totalmente equiboca, cu no ta basa na e realidad di e vonnis di dia 2 di juli 2025. Corte a declara claramente: “No a haya malversacion” un hecho crucial cu Delo ta ignora convenientemente den su analisis. E diferencia ta fundamental: Endy a ser exonera completamente di cualquier acusacion di malversacion.
E Importancia di Corectitud Legal
Como un abogado profesional legal, Delo Gomez mester a compronde cu corectitud ta esencial den cualkier analisis huridico. E falta di corectitud aki ta muestra di ignorancia di e hecho basico, of un intento delibera pa gaña e pueblo Arubano.
E Vonnis di Hoge Raad 2019:
Corte di Hoge Raad na 2019 ya a declara e rapport di EY como “onrechtmatig daad”, un investigacion cu tabatin mas di 100 error confirma pa contra rapport tambe. E decision aki no ta opinion; ta un vonnis legal cu ta declara cu e investigacion tabata ilegal y defectuoso. Ta cuestionabel ora cu Delo Gomez tambe kier kies e caminda, pa ignora un decision di Hogeraad, pa bolbe dicta un sentencia riba e mes un rapport cu ya caba a wordo considera inconfiabel, ya cu e ta carga cu error. Pregunta critico ta: con un director suspendi, sin acceso na su oficina of archivo, por a defende su mes si e documentonan tabata reteni pa LOTTO y Ernst Y Young? Ademas ta hechonan cu no a pasa den tempo cu Endy ta director, sino bao di otro director.
Uso di Creditcard:
E hues a specifica cu tur uso di creditcard tabata limita na: $23.80 pa un incidente den hotel – paga bek y 2x $400 pa e esposanan durante viahe oficial na Chile – paga bek cu comprobante. Corte a enfatisa: “No a haya otro gasto personal” – ni fiesta, ni shopping, ni otro pagonan personal. E hechonan ta cla y verificabel, pero Delo Gomez ta escoge di ignora nan pa sirbi su agenda politico.
Delo Gomez: Abogado of Strategiador Politico?
Nos semper a pensa cu Delo tabata un abogado serio, pero awor e ta mezcla derecho cu politica manera un fanatico. E ta ignora voluntariamente: E vonnis di Hoge Raad (2019) contra EY / E falta di transparencia durante e investigacion / E hecho cu ningun corte a haya malversacion den e caso di Croes. Como abogado, Delo Gomez tin un responsabilidad profesional pa presenta hechonan di manera corecto y completo. Su approach selectivo ta cuestionabel desde punto di vista etico.
Stop cu Fake News legal!
Pueblo merece un analisis honesto, no un manipulacion di hecho pa score politico. Si Delo Gomez kier discuti corupcion, laga e cuminsa cu e casonan unda realmente a termina den condena penal, no cu un caso civil cu ya a ser kibra pa corte supremo, corte di hoge raad.
Bo ta abogado, Delo. No hasi bo mes ridiculo cu comparacionnan sin base. E pueblo ta mirando, y e berdad ta sali na cla!
