Locual a pasa na Rusia por pasa na tur parti di mundu, pasobra e palabra di Dios no ta conta pa un parti di mundo so, tampoco pa cierto pais , pero e ta conta pa henter mundo, locual ta para scirbi den Mateo capitulo 24 y 25:1-13 y 25: 32-46.
Pero tambe laga nos tene na cuenta Mateo 13:24-30 y Mateo 13:24-43.
Y den testament bieu, tur e profetanan cu a scirbi locual awor aki ta tumando lugar y lo bay tuma lugar pasobra e binida di nos Senjor Hesus Cristo ta serca.
E cos nan aki no ta pa spanta hende, pero ta pa confirma un biaha mas manera ta para scirbi den Lucas 21:31-36 bisando: Di berdad, di berdad Mi ta bisa boso,e generacion aki lo no pasa prome cu tur cos tuma lugar,Cielo y tera lo pasa, ma Mi palabranan lo no pasa.
Tene cuidao pa boso curason, no ta carga pa causa di paranda, y buracheria, y e preocupacion di bida, y e dia ey no bini diripiente riba boso manera un trampa.
Pasobra e lo bini riba tur esnan cu ta biba riba superficie di henter mundo.
Ma sea alerta, tur ora bay, haciendo oracion pa boso por tin forsa pa scapa di tur e cosnan aki, cu ta bay tuma lugar y para dilanti di e Yiu di hende.
Awor nos tur ta mira con buracheria, paranda, inmoralidad, preocupacionnan di bida, materialismo a aumenta, hende a perde respet pa Dios, pa nan mes y pa bida di nan prohimo.
Locual Pablo a scirbi den 2 Timoteo 3:1-5 , awor nos ta mire ta cumpli completamente, sin kita, sin pone manera hende grandi ta bisa, unda cu nos bira. nos ta mira con maldad ta crece y hende ta sostene maldad, y ora maldad wordo reprende hende ta rabia.
Wak con hende ta pensa awendia, por ehempel nan auto por drecha, nan cas por drecha, pero ora yega na e matrimonio esey si nan no ta kere cu e por drecha, y nan ta haci tur locual ta posibel pa divorcia, pa sigi venga otro, mientras cu yuinan ta keda traumatisa.
Hende ta haci tur cos pa troce e palabra di Dios, y haci manera ta un cos di broma cune, ora nan por bay contra Dios su palabra y su principionan, practica di maldad y inmoralidad a bira un show, algo di celebra, laga nos mira solamente con uso di droga a bira algo publico den nos comunidad, sin ningun clase di respet, ni pa hende grandi , ni pa mucha.
Y hasta ta pone hende pensa cu tin cierto bario y cierto skina , cu autoridad a lubida, of nan no kier bay , pasobra ta un berguensa enorme locual ta sosode ey banda.
Nos tur ta mira cu locual e palabra di Dios ta bisa den Romanonan 1:18-32 ta cumpliendo y ningun lo tin excuus.Solamente Dios lo tin misericordia.
Pero no lubida e plan di salbacion bunita cu Dios a ofrece na henter mundo bisando:
Pasobra Dios a stima e mundo asina tanto cu E a duna su Yiu unigenito, pa ken cu kere den dj’E no bay perdi, ma tin bida eterna. Dios no a manda e Yiu pa condena e mundo, ma pa mundo wordo salba door di dj’E.
Awendia tin comercio di religion, pero Salbacion ta bini unicamente di Cristo Hesus, Cristo Hesus ta e caminda, e berdad y e bida, ni un hende no por yega serca e Tata si no ta pa medio di e Yiu.
Sinceramente, Pastor Marcel Balootje
