Un atraccion turistico masha popular ta e barco Antilla cu a naufragia na costa di Malmok y su restonan ta bao awa. Dia 10 di mei 2025 a cumpli 85 aña cu el a sink. E pregunta ta, di con e barco a sink eynan? Antilla tin su historia y un pagina den historia di Aruba den Guera Mundial II; y esey ta lo siguiente.
E barco mes: SS Antilla o ES Antilla tabata un barco dje Hamburg – America Line (HAPAG) y a wordo poni den servicio specialmente pa nabega pa e paisnan y islanan den e Lama Caribe y pa esey el a haya e nomber Antilla pa e ciudad Cubano den e provincia di Holguin y no pa e islanan Antiano. E medidanan dje barco tabata: un largura di 121,4m; hanchura di 17,0m; un profundidad (diepgang) di 6,0m y un tonelada di 4363 GRT (Gross Registered Tonnage). E abreviacion ES tabata pa “Elektro Schiff”, pasobra e tabata tin transmision turbo-electrico (dos boiler conecta na un motor electrico) cu tabata dun’e un velocidad di 15 nudo/25km pa ora. Acerca di tabata un barco di carga, e tabata tin shete localidad abordo cu por a acomoda diesdos pasahero. E tabata riba su biahe inaugural, ya cu el a wordo poni den servicio den luna di juli 1939 cu un tripulacion di 36 persona, incluso e capitan Ferdinand Schmidt.
Su biahe y destino. Dia 9 di augustus 1929 SS Antilla tabata na Corsou, di unda el a sali pa Galveston, Texas y aya tuma un carga di 3000 ton di asufre (zwavel, sulfur) pa hiba Europa. Dia 25 di augustus 1939, ainda na Galveston, Capitan Schmidt via radio a haya un mensahe cu e codigo “Essberger” cu tabata dun’e ordo pa habri un casta seya cu instruccionnan; tur e barconan dje flota comercial NAZI tabata tin e carta. E instruccion tabata pa omiti tur ruta oficial di nabegacion y cambia e nomber y e aparencia dje barco. Dia 28 di augustus 1939, riba ruta pa Cartagena na Colombia, na unda el a bunker, Capitan Schmidt a haya otro mensahe radial cu e codigo “Essberger” cu e ordo cu si e no por yega Alemania prome cu 1 di september, p’e busca refugio den un pais neutral. Capitan Schmidt a purba yega Corsou, pero el a wordo notifica cu e haf na Corsou tabata congestiona cu barconan Aleman y a dicidi di yega Aruba. Dia 1 di september 1939, dia cu Alemania NAZI a invadi Polonia, SS Antilla a descarga e 3000 ton di asufre na haf di San Nicolas y a haya permiso/ordo pa hancra pabao dje costa di Malmok. Tres barco Aleman mas a haya refugio na Malmok: SS Troya – tambe di Hamburg-America Line, SS Horn’s Consul dje compania Horn, y SS Heidelberg di Rudolf Christian Gribel. Henter e resto dje aña 1939 tabata tin cuater barco Aleman hancra na Malmok y nan presencia a bira algo normal pa e habitantenan di Noord. Nan tabata wordo monitorea door dje submarino Hulandes HMS O14 y pafo dje awanan dje islanan Hulandes, barconan di guera Britanico y Frances tabata blokia e pasada di tur barco Aleman. Pero na januari 1940 e scenario na Malmok a cuminsa cambia; den e anochi di 9 di januari e barco Horn’s Consul a logra huy y pasa e blokeo. Dia 29 di februari e barconan Heidelberg y Troya a purba huy, pero nan a wordo intercepta door di barconan Britanico y pa no wordo captura, e capitannan a laga habri e valvenan den e cuarto di motor y sink e barconan.
Dia 9 di april 1940 Alemania a invadi Noruega y dia 12 di april, pa motibo cu Hulanda tabata teme un invasion tambe, autoridad Hulandes na Aruba a confina (beperk) e tripulante di Antilla pa keda abordo.
Dia 10 di mei 1940 Alemania a invadi Hulanda. E dia ey pa 3:10 di marduga – 8:10 na Hulanda – mariniernan bao comando di un Kapitein der Mariniers a bay pa confisca Antilla, pero e capitan di Antilla a nenga di baha e gangway. Pa temor cu capitan Schmidt lo uza resistencia cu arma, e mariniernan a retira. Seis or di mainta e barconan HM Aruba y HM Practico a bay pa confisca Antilla, pero e tempo cu e autoridad a tarda, tabata suficiente pa Schmidt a duna orden pa habri e valve, pega diferente luga den e barco na candela y sink e.
Mas o menos nueb’or y mei di mainta e klok di misa Sta. Anna a cuminsa bati, locual tabata inusual y tabata sucede solamente ora tin algo excepcional ta pasando. E pastoor, cu e unico telefon na Noord, tabata e prome persona na Noord cu a haya e noticia cu Alemania a invadi Hulanda y foi pastorie e noticia a plama den pueblo. Foi e top dje sero di Boegoeroei e habitantenan tabata mira Antilla na candela cu huma preto ta bay laira y pocopoco e tabata sink. Pero como e tabata hancra mas cerca dje costa y e lama no ta masha hundo eynan, e dek di Antilla a keda riba awa y tabata bisto foi e costa.
Na 1955 e horcan Janet – e horcan mas grandi di siglo 20 – dia 23 di september a drenta Caribe cu e categoria 3 y a crece yega na un horcan di categoria 5. Janet a pasa basta panort di Aruba cu e categoria 4 cu biento di 209 – 251 km/ora. Lama tabata masha bruto cu olanan masha halto y e olanan a hala Antilla mas afo foi e costa y a kibr’e. Eynan Antilla a haya su graf permanente y Aruba un atraccion turistico.
Fuentenan: Wikipedia;
Lloyd’s of Londno; y
Experiencia dje Autro, Vivienno Frank Sr.
