Na aña 2022 Rainbow Warriors Core Foundation a crea un campaña annual cu ta corre di April 8 te cu Juni 8, yama “Eight to Eight, Because Our Planet Can’t Wait”.
E idea original tawata pa un campaña cu ta dura mas cu solamente algun dia den aña manera Dia di Tera, Dia Mundial di Medio Ambiente pa enfoca riba e necesidad urgente pa accion immediato y continuo pa cumpli cu metanan pa combati cambio climatico, Obhetivonan pa Desaroyo Sostenibel (SDGs) y proteccion mundialmente di biodiversidad y ecosistema, vital pa seguridad alimentario y salud global.
Sinembargo na 2024 a cuminza nota cu derechonan humano basico y e (libertad den practica di) ciencia na nivel global ta bou menaza y cu sin garantia di salvaguardia di derecho humano y ciencia desaroyo sostenibel ta bira inalcanzabel na nivel local, regional y internacional.
Desaroyonan na Merca en particular ta pone den cuestion e salvaguardia di derecho humano, ciencia y fondo disponibel pa esfuerzo pa alcanza desaroyo sostenibel y e Obhetivonan di Desaroyo Sostenibel.
Esaki a conduci na cambia e formato di e campaña y su nomber, enfatisando e necesidad urgente pa garantisa cu derechonan humano y ciencia ser respeta como fundeshi pa alcanza un desaroyo sostenibel den contexto economico, social y ecologico.
E campaña a haña e nomber “Defending Science and Freedom to Safeguard Sustainable Development”, esta “Defendiendo Ciencia y Libertad pa Salvaguardia di Desaroyo Sostenibel”
DEFENDING SCIENCE AND FREEDOM TO SAFEGUARD SUSTAINABLE DEVELOPMENT
E campaña aki ta corre annualmente di April 12, te cu Juni 20. E tin un doble enfoque.
DECADANAN INTERNACIONAL Y DI NACIONAN UNI
Lo cubri e tematicanan di lo siguiente:
- Decada Internacional Di Lenguanan Indigena (2022-2032)
- Decada di Nacionan Uni pa Envehecimento Saludabel (2021-2030)
- Decada di Nacionan Uni pa Restoracion di Ecosistema (2021-2030)
- Decada di Nacionan Uni di Ciencia Oceanico pa Desaroyo Sostenibel (2021-2030)
- Decada di Nacionan Uni di Agricultura Familiar (Cunucu, agricultura escala chikito) (2019-2028)
- Decada Internacional pa Accion “Awa Dushi pa Desaroyo Sostenibel” (2018-2028)
- Decada di Nacionan Uni di Accion pa Nutricion (2016-2025)
DIANAN INTERNACIONAL
- Dia Internacional di Vuelonan Espacial Tripula, April 12
- Dia Mundial di Creatividad y Innovacion, April 21
- Dia di (Mama) Tera, April 22
- Dia Mundial di Buki y Derecho di Autor, April 23
- Dia Mundial di Propiedad Intellectual, April 26
- Dia Mundial pa Seguridad y Salud na Trabou, April 28
- Dia Mundial pa Libertad di Prensa, Mei 3
- Dia Mundial di Parha Migratorio, Mei 11
- Dia Internacional di Salud di Planta, Mei 12
- Dia Mundial di Telecomunicacion y Sociedad di Informacion. Mei 17
- Dia Mundial di Abeha, Mei 20
- Dia Mundial pa Diversidad Biologico, Mei 22
- Dia Mundial di Bicicleta, Juni 3
- Dia Mundial di Medio Ambiente/Dia Mundial pa Combati Pesca Ilegal, No Raporta y No Regula, Juni 5
- Dia Mundial di Seguridad den Preparacion/Produccion di Cuminda, Juni 7
- Dia Mundial di Oceano, Juni 8
- Dia Mundial pa Concientisacion pa Abuso di Hende Grandi, Juni 15
- Dia Mundial di Refugiado, Juni 20
MENSAHE PA DIA DI TERA 2025 CU E TEMA “NOS PODER, NOS PLANETA”
E aña aki a Nacionan Uni y Earth Day Network a scohe e tema “Our Power, Our Planet” enfocando riba e necesidad pa cambia pa energia renovabel y elimina e uso di combustibel fosil.
E realidad amargo ta cu den e ultimo tres aña e esfuerzonan pa logra e metanan acorda den e Acuerdo di Paris pa reduci uso di combustibel fosil y emisionan di gasnan invernadero crea dor di uso di carbon, azeta y gas a cuminza fracasa y e lobby di Big Oil and Gas (e industria global di hidrocarburo) a hasta logra mediante legislacion introduci na Merca, Inglaterra y docenas di pais rond mundo censura, silencia y pone sentencia pisa riba activistanan y NGOs manera Just Stop Oil, Extinction Rebellion y Greenpeace, protestando contra e sabotahe di e Acuerdo di Paris y accion global pa elimina combustibel fosil. Just Stop Oil a termina su protestanan despues cu multiple integrante di e organisacion a ser sentencia na varios aña di prison, entre otro algun hende grandi. Den e caso di litigacion di Energy Transfer contra Greenpeace pa nan sosten na e campaña di protesta contra e Dakota Access Pipeline un hurado na North Dakota a otorga Energy Transfer un suma di daño y perhuicio di mas di 600 miyon USD cu Greenpeace USA, Greenpeace Council na Amsterdam lo tin cu paga. Y hasta na Holanda e organisacion global Civicus a señala den su rapport Civicus Monitor 2024 cu na Holanda a comete violacionan di derechonan humano den protestanan di activistanan climatico, y cu awor hasta tin un ley riba mesa na Holanda pa restringi protestanan pacifico riba caya di activistanan en general.
E prueba mas palpabel di fracaso tawata e cumbre climatico global teni na Baku, Azerbaijan na 2024, na unda no a logra e meta di un Loss and Damage Fund adecuado pa atende cu impactonan financiero di cambio climatico pa paisnan den desaroyo y islanan chikito y alabes fondonan necesario pa e paisnan den desaroyo encamina un politica di transicion energetico pa yega na eliminacion di combustibel fosil y uso di energia renovabel.
E idea tras e tema Our Power, Our Planet ta cu e ciudadano, consumidor y votador por yuda na combati cambio climatico dor di reduci su “Carbon Footprint” y cu companianan y paisnan por contribui na combati cambio climatico mediante carbon credits trading.
E carbon footprint ta un concepto crea dor di e compania di relacionan publico Ogilvy and Mather pa su cliente British Petroleum (BP) pa despista e consumidor y pone e culpa di cambio climatico riba e consumidor, kitando e responsabilidad corporativo di e industria di hidrocarburo pa daño causa na clima.
Y e mesun panel cientifico IPCC cu ta traha e raportnan pa fiha linea di accion di Nacionan Uni su entidad encarga cu cambio climatico, UNFCCC, a indica cu mester stop e practica di carbon credits trading.
Pesey e tema di Dia di Tera, cu ta Our Power, Our Planet mester ser interpreta como Nos Poder, Nos Planeta, señalando cu nos tin e poder den nos man pa cambia e manera di funciona di nos gobernantenan y Big Oil and Gas.
Na Aruba nos por cuminza exigi pa manda tur contract cu Eagle LNG bari di sushi. Y si nos kier logra reduci carbon footprints di consumidor y den comercio y industria, nos mester cambia nos leynan pa permiti aumento den produccion di energia renovabel pa uso residencial y comercial y permiti competencia den e negoshi di charging stations, hasta pa nan por remplaza gasolin service stations.
