ORANJESTAD – Diamars awor 29 di Juli 2025, Hof di Corte Superior, lo trata e apelacion di Parlamentario Mike de Meza, contra e decision di Hues di Corte den Promer Instancia di 17 di July 2025.
Dia 17 di Juli 2025, Hues di Corte den Promer Instancia a trata e caso cu Mike de Meza a cuminsa contra Ministerio Publico. Tratamento di e caso tabata cu portanan sera pero por a compronde cu abogado mr. Croes hunto cu Duijneveld a exigi pa Hues, a base di articulo 43 di Codico di Procedimento Penal, ordena Ministerio Publico pa duna Mike de Meza mas informacion tocante e tipo y e motibo di e acusacionnan contra dje. Ademas mr. Croes y Duijneveld a exigi pa Ministerio Publico tuma un decision riba e persecusion penal promer cu 15 Augustus 2025.
Hues a rechaza e peticionnan y mr. Croes a apela contra e sentencia.
Hof di Corte Superior a stipula cu Diamars 29 Juli 2025 pa 2’or di merdia, lo trata e apelacion.
E tratamento di e apelacion lo ta cu portanan sera, esta cu prensa no por cubri esaki. Por a compronde cu ta via video conference e tratamento lo tuma lugar. E tres Huesnan cu ta forma Hof lo ta den Corte di Husticia na Curacao y via pantaya grandi den sala di Corte di Husticia di Aruba, lo trata e apelacion.
