Diadomingo 8 juni, 2025 a tuma lugar na e ballpark di Aruba Jrs e apertura oficial di e prome torneo organisa pa Aruba Senior Softball Association pa 2025.
Den e ceremonia di apertura e Grupo Scout Sint Hyacinthus di Savaneta a lidera e 9 equipo y miembronan di bestuur riba veld. E himno nacional a wordo canta door di e hoben J-Vyôn Besselink.
E torneo a wordo dedica na e siguiente homenagiadonan ; Johnny Martis (J.T.Tigers SBT) Richard “Richie” Betrian (Sluggers SBT) Edgardo “Eddy” Dirksz (Deco’s Classic SBT) Juan Robles de Medina (Jani’s Heavy Equipment SBT)
Ricladov “Cai” Vrolijk (Surprise Troopers SBT) Juan “Juancho” Tromp (Aruba Juniors SBT) Dennis “Buga” Blijden (Astros SBT) Kenneth Alias (Boomerang SBT) Rudolph “Rudy” Carti (Glovers SBT).
Cada homenagiado a ricibi un plakaat como un reconocemento pa nan gran aporte, passion y dedicacion, un ehempel di disciplina na deporte di softball Arubano.
E prome bala a wordo saca door di Sr. Luis Tromp – presidente di Aruba Juniors y como bateador a fungi Sr. Rudy Leysner – Presidente di Fundacion di Movemiento ta Bida.
Despues di e apertura a sigui cu e prome 4 wega pa clasifica pa playoffs otro luna. E torneo aki ta priminti di bira un celebracion emocionante di deporte na unda nos atletanan adulto mayor lo bataya contra otro den un ambiente di hermandad. A.S.S.A kier a gradici tur persona cu a yuda hasi e apertura bira un exito total y na e mesun momento A.S.S.A. ta invita pueblo pa bin disfruta di softball di nivel tur diadomingo na Aruba Juniors. E siguiente wega lo bay ta dia 22 di juni.
