Diaranzon den Corte durante tratamento di e caso Flamingo, Hues a trata tambe e parti di 3ambtenaar fantasma.
SOLO DI PUEBLO por a compronde cu apesar cu Hues a mustra riba e caso di Geerman cu a admiti y a bay di acuerdo pa paga 120 mil florin na Ministerio Publico, Otmar Oduber ta insisti cu e no tabatin ambtenaar fantasma.
UN PERSONA A ADMITI Y A PAGA 120 MIL FLORIN
Hues a bisa cu Geerman no ta presente den tratamento di e caso pasobra Geerman a yega na un acuerdo di transaccion cu Ministerio Publico di paga 120 mil florin pa no tin un caso penal contra dje. Hues a puntra Otmar Oduber riba e 3 ambtenaar fantasma cu e ta wordo acusa di dje. Otmar a bisa Hues cu tur ambtenaar el a scoge y e tabata traha cu nan.
Otmar a bisa cu Geerman a papia cun’e di proyecto pa yuda muchanan special y tambe pa percura cu Otmar ta den media. Hues a mustra cu Geerman a declara na Landsrecherche cu Otmar a acerk’e pa ta den su programa den oranan di mainta como minister. Otmar a bisa cu su “pr chief” (hefe di relacionnan publico), tabatin contacto cu Geerman y e mes tabatin contacto cu Geerman.
Hues a bisa cu e acuerdo di transaccion ta mustra cu Geerman ta reconoce su culpa di ambtenaar fantasma. El a puntra Otmar kico Otmar tin di bisa riba esey. Otmar a bisa cu e no sa pakico Geerman a paga. E no sa ki palabracion Geerman tabatin cu Ministerio Publico. Segun Otmar, Geerman a bis’e cu su famia ta depende di e entrada cu su programa na radio ta produci.
Pa loke ta Phillips, Otmar a bisa cu e conoce Phillips como hende hopi critico pa desaroyo pa San Nicolas. Otmar a bisa cu den su campaña el a enfoca riba San Nicolas y ora el a bira minister el a acerca Phillips pa traha cun’e. El a bisa cu e ta hopi satisfecho cu e trabaonan cu Phillips a haci.
Phillips a bisa Hues cu e tabata encarga cu San Nicolas y tabata cana rond, check tur e casnan cu ta bandona y tabata informa Otmar. Tambe el a bisa cu e tabata check lugarnan cu mester di mantencion, etc. Tambe e tabata wak e situacion di negoshinan.
Hues a remarca cu lamentable ta cu no tin ningun raport, copia di whatsapp cu ta confirma di loke ta papia. Segun Phillips e no tabata traha raport pasobra el a ripara cu otro partidonan politico ta copia su proyectonan. El a dicidi di papia directo cu Otmar.
UN SOSPECHOSO NO TABATA TRAHA PA GOBIERNO
Pa loke ta Tiel, Otmar a splica cu Tiel tin hopi contacto cu latinonan y e tabata core campaña pa AVP. El a bisa cu el a acerca Tiel y Tiel tabata traha p’e pero na oficina di Gobierno.
Hues a mustra cu Tiel tabata den un caso dia 23 December 2020 y Hues a declara no admisibel cu Tiel tabata den servicio di Gobierno. Hues di e caso menciona, ta haya cu Tiel tabata un patronahe politico y no tabatin un trabao den Gobierno, ganando mas cu 4 mil florin. Hues a mustra cu Corte ta haya cu no tabatin un acuerdo di trabao real y a declara Tiel no admisibel.
Hues a mustra tambe cu Tiel lo tabata traha pa e compania di yiu di Otmar, Jeandrick den su tempo liber. Otmar a bisa cu el a haci asina cu 5 otro trahador, pa nan por haci otro trabao. Jeandrick a bisa Hues cu Tiel tabata traha cun’e den bar pasobra Tiel tin hopi conocemento. El a bisa cu Tiel tabata gana a base di comision.
Hues a mustra cu a interoga Jeandrick y a scucha combersacionnan y Landsrecherche ta conclui cu Tiel tabata den servicio di Jeandrick. Hues a mustra cu Tiel a wordo interoga na Hues Comisario caminda el a bisa cu e tabata traha pa Jeandrick y tabata haya comision.
OTMAR TA NENGA DI TABATIN AMBTANAAR FANTASMA
Otmar a para riba cu tur su ambtenaarnan a traha debidamente y ningun momento tabatin ambtenaar fantasma. El a bisa tambe cu ta asina cu cada minister por busca su hendenan cu e kier pa traha p’e y no ta asina cu mester tin un acuerdo di trabao.
Manera e acusacionnan ta mustra, e asunto di ambtenaar fantasma, ta wordo considera malversacion di placa di Gobierno.
Ta asina cu mayan ta sigui cu tratamento caso Flamingo, caminda lo trata e acusacion contra Eisia Esser kende ta wordo sospecha di ta complice di a wordo cumpra entre November 2017 y 2020. E lo a tuma cosnan di Vito Croes.
