Departamento di Enseñansa Aruba (DEA) ta informa studiantenan cu kier bin na remarca pa un prestamo di estudio “Arubalening” entrante augustus 2022 di e proceso di aplicacion.
Land Aruba ta brinda studiantenan cu kier sigui cu nan estudio na Aruba of den exterior un prestamo pa studia. E prestamo aki yama Arubalening. Intencion di e Arubalening ta pa yuda un studiante cu su gastonan di estudio. E productonan di Arubalening ta consisti di dos componente: un “Startpakket” pa facilita gastonan inicial di estudio y “Termijnuitbetalingen” pa facilita gastonan durante e trayecto di estudio.
E studiante por aplica pa un Arubalening pa studia:
– na Aruba den middelbaar beroepsonderwijs of hoger onderwijs (EPI, IPA of UA) of – den exterior den hoger onderwijs.
Arubalening Portal
Studiantenan cu ta desea di bin na remarca pa un Arubalening mester aplica pa esaki via di e Arubalening Portal. Por haya e Arubalening Portal via e website www.ea.aw.
E prome stap ta pa registra pa un Arubalening Account. Pa registra e studiante mester un paspoort Hulandes y un email adres valido.
Unabes e studiante obtene su Arubalening Account e studiante ta haci uzo di esaki pa login den e Arubalening Portal pa asina cuminsa cu su proceso di aplicacion.
E proceso di aplicacion pa un Arubalening ta consisti di diferente paso y mester haci entrega di diferente documento. Henter e proceso di aplicacion inlcuyendo e periodo di evaluacion di e aplicacion ta dura aproximadamente 3 luna.
Durante e periodo aki ta conseha e studiante pa ta atento cu su email ya cu e por ricibi notificacion y informacion importante. Tambe ta rekeri di e studiante cu e ta log in regularmente den su Arubalening Portal pa verifica e status di su aplicacion.
WWW.EA.AW, WWW.PAPIAMENTO.AW, +297 528 3400, STADIONWEG 37, ORANJESTAD, ARUBA
Deadlines
Pa studiantenan cu kier bin na remarca pa un Arubalening entrante Augustus 2022, e prome deadline ta dia 10 di maart 2022. Esaki ta e ultimo dia pa registra pa un Arubalening Account.
E di dos deadline ta dia 20 di maart 2022. Esaki ta e ultimo dia pa entrega e prome documentonan rekeri (prueba di persoonsnummer, di adres y di periodo di inscripcion na Land Aruba).
Mas informacion
Pa tur detaye relaciona cu e aplicacion, pa mas informacion di e productonan di Arubalening, e sumanan di prestamo, e documentonan necesario y e diferente deadlines pa bin na remarca pa un Arubalening entrante augustus 2022 of januari 2023, mester acudi na website Enseñansa Aruba: www.ea.aw > Arubalening Portal.
Tambe ta sugeri studiantenan pa sigui Departamento di Enseñansa Aruba riba Facebook y/of Instagram @EducationAruba pa keda na altura di tur informacion.
