Tabata ayera mainta, cu tabatin e ciere di anja na KIA, dunando Spirituele y Sociale Begeleiding, cu mi por a ripara un biaha mas, cuanto dolor ta haci ora hende perde nan libertad, y hopi biaha pa cos cu no tin e balor, hechonan cu a wordo cometi cu despues hende ta bin lamenta seriamente.
Especialmente ora e fin di anja ta yega y cu bo ta sera aki Aruba leu for di bo sernan keri, y bo no sa den kico bo famia ta pasando, con bo esposa y bo yuinan ta sufriendo, dolor grandi ta drenta bo curason.
Esnan cu ta local mes ta hopi tristo, pasobra un anja mas tras di tralie, y sabiendo cu e cos no a caba ainda hopi lagrima ta wordo derama, cu awor nan tin e prome anja y tin 4, 5, 6 anja mas cu nan no por spera libertad, y na e momento ey ta experiencia con mentiroso diabel por ta, con enganjoso droga y alcohol por ta. Y con falta di dominio propio y sensualidad por hiba hende te den prison.
No conta mes pa e hobennan cu ta corda riba nan mayornan, e ambiente di Pasco y Anja nobo, e salimento, e baymento di fiesta, e carinjo di mama y tata, y no lubida riba e wela cu semper ta malcrianan den fin di anja cu locual cu nan kier.
Di berdad ta bin padilanti un biaha mas cu libertad ta algo di balora, ta algo di aprecia, y ta algo pa gradici Dios pe cada dia y cada momento.
Pero tambe nos ta corda cu hende grandi tin un dicho ta bisa, ta ora bo perde un cos bo ta sinti su balor.
Palabra di Dios ta bisa lo siguiente: Pasobra pica lo no tin dominio mas riba boso, pasobra boso no ta bao di ley, ma bao di gracia.( Romanonan 6:18).
Ora nos tin Cristo Hesus na prome lugar den nos bida,
Nos tin cu sa cu ta pa gracia nos ta salba door di fe, y esey no ta bini di nos mes e ta e don di Dios.
Y una bes nos ta den Cristo Hesus, pica ya no tin dominio mas de nos bida, pasobra caminda e Spirito di Dios ta eynan tin libertad.
Pesey Galationan 5:19-21 ta demostra na nos cu esnan cu ta cana den obranan di carni, no ta agrada Dios y lo no hereda e reino di Dios.
Pero e mesun Galationan 5;22-26 ta mustra kico e fruta di Spirito Santo por haci den nos bida, pasobra no tin ley contra bondad, pasobra esnan cu ta pertenece na Cristo Hesusn a crucifica e carni cu su pasion y deseonan.
Awor tin algo cu tur hende mester tene cuenta cune: Ta pa libertad Cristo a haci nos liber, pesey keda para firme y no sea someti atrobe na un yugo di sclavitud.
No laga nos lubida kico Senjor a haci pa nos pasobra e palabra di Dios ta bisa cu tur autoridad;
Of boso no sa cu boso curpa ta e tempel di Spirito Santo, kende ta den boso,kende boso tin di Dios, y cu boso no ta pertenece na boso mes. Pasobra boso a wordo cumpra pa un preis, pesey glorifica Dios den boso curpa.( 1 Corintionan 6:19-20).
Laga tur hende somete nan mes na e autoridadnan cu ta goberna, pasobra no tin autoridad cu no ta di Dios y esnan cu ta existi ta Dios a establece nan.( Romanonan 13:1).
Como mayor laga nos haci tur esfuerso pa lanta nos yuinan den displina y amor di Dios.
Sinceramente, Pastor Marcel Balootje
