Esaki ta un yamada di Dios, pa tur hende, tur rasa, tur nacionalidad, no tin ningun hende riba e mundo aki cu no tin cu arepenti di su picanan, pasobra nos tur a peca, y nos mester di un Salbador, Esun cu a redimi nos for di pica, cu su Sanger precioso, pesey nos mester arepenti, confesa y aparta for di pica.
Hopi tempo ta wordo poni na cosnan cu no ta necesario, cosnan temporal cu ta aparta nos for di Dios, pero tur hende ta lubida cu Dios ta manda nos pa arepenti,
Si nos tira un bista y wak rond cuanto bida y cuanto famia, y hobennan ta bay perdi tur dia, cuanto matrimonio ta kibra, cuanto hende ta bandona nan cas, cuanto suicidio, aunke a bira na moda awor cu ora un suicidio tuma lugar e ta wordo scondi of menos publica, pa no spanta hende, of pa otronan no imita, pero e unico cos cu tur hende mester sa cu ora un hende arepenti , esey ta nifica cu suicidio ta bay lew for di su bida, pasobra diabel no tin gara riba dje mas.
Ora nos wak con hende ta bringa otro, faltamento di respet, orguyo y arogancia, falta di pordon, pustamento ken ta mihor cu otro, gera den cas y pafo di cas, gera riba caya, nos mester compronde pakico Dios ta yama nos tur na arepentimento.
Locual ta para scirbi den Mateo 3;2, Mateo 4:17 y Marco 1:15 ta keto bay vigente pa bida di tur hende, arepentimento ta un cos cu mester tuma lugar tur dia, pa asina nos tin pas cu Dios y biba cu un curason limpi den presencia di Dios.
Pasobra no laga nos lubida locual ta para scirbi:Ma si nos cana den lus mescos cu e ta den lus, nos tin comunion cu otro, Y e sanger di Hesus, Su Yiu ta limpia nos di tur pica.
Si nos bisa cu nos no tin pica,nos ta gaña nos mes, y e berdad no ta den nos. Si nos confesa nos picanan, E ta fiel y husto pa pordona nos , nos picanan y pa limpia nos di tur inhusticia. Si nos bisa cu nos no a haci pica, nos ta haci’E un gañado y Su palabra no ta den nos.( 1 Juan 1:7-10).
Awendia nos tur por mira con hende, ta prefera di perde tur locual ta matrimonio y yuinan, pasobra nan no kier pidi despensa, pasobra nan no kier arepenti, ni tampoco pordona, y laga los, pero hopi ta lubida cu e palabra di Dios ta bisa cu si nos no pordona, Dios tampoco ta pordona nos, locual ta para scirbi den Mateo 6:14-15 y Mateo 18:33-35 mester ta suficiente pa convence tur hende, tocante di falta di pordon, pa asina nos arepenti.
Arepentimento ta un cambio mental cu ta rechasa pica, y bira pa Dios, y aparta nos mes for di e bida di pica, orguyo, e bida di vengansa, pasobra nos tin di reconoce, cu no tin dos forma pa stima nos prohimo, serca Dios no tin wega, amor ta di Dios, y amor no tin dos cara, pesey nos mester haci manera e palabra ta bisa: Aspira pa tin pas cu tur hende y santificacion, sin cual ningun hende lo mira Señor.( Hebreonan 12:14).
Dios ta yamando mundo completo pa arepenti, pasobra awor mas cu nunca e binida di nos Señor ta serca, ta tempo pa kita bista for di cosnan carnal y fiha nos bista riba Cristo e autor di nos salbacion, y bida eterna.
Sinceramente, Pastor Marcel Balootje
