Ariba 20 di november, dia Internacional di Derecho di Mucha, 131 Aruba ta celebra 26 aña di existencia aki na Aruba.
Banda di e servicionan di telefon, email y chat, 131 Aruba ta brinda servicio di charla, workshop, proyecto y training na muchanan, hobenan y docentenan na tur scolnan aki na Aruba. E scolnan na Aruba ta partnernan importante den e trabao cu 131 Aruba ta haci. E scolnan, e docentenan, e muchanan y hobenan ta parti di e exito di 131 Aruba. Pa medio di informacion preventivo cu e muchanan, hobenan y docentenan ta ricibi for di 131 Aruba durante charla, workshop, proyecto y training, hopi problema ta ser evita efectivamente.
De cuadro di e celebracion di dia Internacional di Derecho di Mucha y 26 aña di existencia di 131 Aruba, un total di 53 scol ful rond di Aruba ta lanta e bandera di 131 aruba ariba dia 20 di november. Cu lantamento di e bandera di 131 Aruba, e scolnan ta mustra nan apoyo y gradicimento pa e trabao cu 131 Aruba ta implementa na e scolnan.
131 Aruba kier a gradici e scolnan na Aruba y su otro partnernan cu ta tuma nan impacto social na serio y ta inverti den e muchanan, hobenan y famia aki na Aruba. Un gradicimento ta bay na Setar N.V., Aruba Airport Authority N.V., WEB Aruba N.V., The Salamander Group, Aruba Hotel and Tourism Association, Telearuba, Marriott Resort Aruba, Vacation Aruba.com, New India Assurance, N.V. ELMAR, The Movies y MetaCorp N.V. cu ta haci hopi trabao di 131 Aruba posibel.
Pa mas informacion tocante e trabao di 131 Aruba den scolnan na Aruba por tuma contacto cu 131 Aruba via nos website: 131.aw, facebook: https://www.facebook.com/aruba.131/, email: 131aruba@gmail.com of telefon 5886138/ 5884011.
