Diabierna mainta Corte di Husticia no a sigui cu tratamento di e caso penal cu Ministerio Publico a cuminsa contra e homber E. (29). Esaki door cu Fiscal a pidi pa pospone e caso pendiente investigacion na Hulanda.
SOLO DI PUEBLO por a compronde cu e homber E. ta wordo acusa di a viola un dama y a chantagea dos dama. Hues a pospone e caso pasobra e investigacion na Hulanda ta hopi importante.
VIOLACION DI UN DAMA Y CHANTAGE DI DOS DAMA
Den sala di Corte tabata presente un di e victimanan di chantage, e dama T., kende a wordo acompaña pa su famia y abogado mr. Gravenstijn. Tambe tabata presente e mayornan di e sospechoso E.
Hues a bisa cu aña pasa a cuminsa cu e caso. Tin dos acusacion contra E. E promer acusacion ta cu na 2014, el a viola e dama S. na Curacao. E di dos acusacion ta cu entre 1 Januari 2015 y 2023 el a chantagea e damanan B. y T., door di menaza nan di haci cosnan sino e lo publica cos di nan. Tambe tin e acusacion di cu na Januari 2023, E. tabata hack e dama T. na Hulanda.
Hues a sigui bisa cu recien a haya relato di e victima, dama S. Tambe tin raport di psychiater riba E. Ta asina cu e dama T. a haci un demanda di daño. Ta asina cu e dama S., ora el a haya sa cu E. a wordo deteni na Aruba, a haci denuncia contra E.
Hues a splica cu a bin un desaroyo nobo den e caso, caminda recien Fiscal a pidi via mail na Hues y abogado di E., mr. Illes pa pospone e caso pasobra e kier mas investigacion. Abogado mr. Illes ta contra esaki.
FISCAL KIER MAS INVESTIGACION
Den Corte por a constata cu tin dos Fiscal ta atende e caso aki. Un Fiscal a bisa Hues cu e motibo cu a pidi pospone e caso ta pasobra cu e Instituto Forence na Hulanda (NFI) ta haciendo un investigacion di stem riba telefoon pa mira si ta e acusado E. Ta asina cu E. ta nenga di a yama. Fiscal a bisa cu segun NFI, e investigacion lo dura 4 siman pa tin resultado.
Fiscal a bisa Hues cu e ta kere cu e resultado di e investigacion di NFI ta importante pa tanto Fiscal y e acusado. Hues a puntra pa ki dia lo por trata e caso. Fiscal a bisa cu lo por trata e caso na final di Februari 2026. Hues a bisa cu fin di Februari 2026, e tin cu trata un caso grandi y abogado mr. Illes tambe ta ocupa cu e caso ey. Hues a puntra pa na Maart. Fiscal a propone pa 20 Maart 2026 pa 8.30 mainta.
Abogado mr. Illes a bisa cu si Hues pospone e caso, e ta pidi pa laga E. liber bou condicionnan specifico pa asina psychiater por atende E. E abogado a bisa Hues cu E. tin problema mental cu mester di tratamento.
Fiscal a bay contra pa laga E. liber pa haya tratamento. El a bisa cu ta trata aki di un caso hopi serio y tin motibonan di peso. El a bisa cu e posponemento ta den un tempo razonabel di 2 luna.
CASO TA KEDA POSPONI
Hues a bisa cu e ta aproba e investigacion cu ta importante pa sa si ta E. a papia via telefoon pasobra tin cosnan serio a wordo papia.
Hues a bisa cu e peticion di abogado mr. Illes ta wordo rechaza. Na opinion di Hues, ta acusacionnan hopi serio, violacion y chantage di dos dama. Hues a remarca cu anterior a laga E. liber pero e ora ey el a bay haci otro delito. A keda palabra cu 20 Maart 2026 lo tin tratamento di e caso.
