Diasabra dia 8 di mei, e competencia di poesia y cuenta cortico pa alumnonan di scol secundario “Arte di Palabra” a tuma luga den Cas di Cultura.
Arte di Palabra ta un proyecto di Departamento di Cultura bou di auspicio di Ministerio di Cultura y cu coperacion di Fundacion di Corector Papiamento.
Un cantidad di 21 participante a presenta nan poesia y storia cortico pa un plublico di 150 persona, cual ta e cantidad cu Cas di Cultura ta permiti.
Di e 21 participantenan, tin 18 hoben cu a participa pa prome biaha cu Arte di Palabra y prome biaha riba tarima. Naturalmente esaki ta trece poco nervio ariba, pero asina mes nan tabatin e curashi di subi tarima y presenta nan poesia y cuenta.
Scolnan cu a participa ta Ceque College, Abraham de Veer School, Colegio Nigel Matthew y John Wesley College.
Despues cu tur participante a caba di presenta y publico tabata warda resultado, por a gosa di presentacion di Anaisa Orman cu a presenta cu un poesia titula “Un era nobo” y a finalisa esaki cu un baile di Katy Perry titula “Not the end of the world”. Despues a sigui cu un otro presentacion di Popcorn Dancers cu a baila un Afro House titula “Boda Sodiq”.
Minister di Financia, Economia y Cultura mr. Xiomara Maduro huntu cu parlamentario Shailiny Lee, Directeur di Departamento di Cultura drs. Siegfried Dumfries, miembronan di hurado Samantha Trinidad, Mirzah Manga, Elienne Riatiga, miembro di comision Arte di Palabra Corsou Quinten Brunken a haci entrega di premio pa e siguiente finalistanan.
Categoria B (poesia original klas 1-2)
- Eliziёn Antersyn di Colegio Nigel Matthew cu su poesia, Un dia sin nada
- Joshua Samuels di Abraham de Veer School cu su poesia, Solo
- Nigella Albertus di Abraham de Veer School cu su poesia, Mi dushi Aruba
- Suanny Cañas di Ceque College cu su poesia, Mi alma ta kibra
- Amaranta Castillo di Ceque College cu su poesia, Sin seguridad
Categoria C (poesia original klas 3-6)
- Heily- Ann Giel di Ceque College cu su poesia, Naturalesa, nos rikesa
- Cayley Figaroa di John Wesley College cu su poesia, Unda bo kier ta
- Esmeralda Bryson di Ceque College cu su poesia, Ta hende muhe nos ta
Categoria E (cuenta original klas 1-2)
- Guizza Steenvoorde di Ceque College cu su cuenta, Papa soda di miedo
Categoria F (cuenta original klas 3-6)
- Rafael Garcia di Colegio Nigel Matthew cu su cuenta, Dicon
E Ganado absoluto kende ta e participante cu e punto di mas halto general a bira Rafael Garcia
Tur finalista lo representa Aruba den e competencia di Arte di Palabra ABC, unda cu e finalistanan di Bonaire y Corsou lo bin e biaha aki Aruba pa intercambia y competi cu otro. AdP ABC ta plania pa dia 12 di juni na Cas di Cultura si situacion di covid-19 ta permiti. Por sigui e pagina di FB “Arte di Palabra Aruba” pa mas informacion.
Potretnan cortesia di Jhon Freddy Momtoya
