Aruba ta bay experencia un concierto manera nunca a experencia ainda na Aruba. E concierto “ E NÒMBER “ cu e artista internacional Chantal Huybregts Pickens hunto cu Shannon Bueno, MDG Worship y Rejoice dance Ministery Aruba dia 18 di april venidero na Iglecia Odres Nuevos na paradera 4 , un y tur ta bon bini.
E artista internacional Chantal Huybregts ta e gran hoben Yiu di Corsou, a nace na Hulanda dia 27 di juni 1994. E tin un bos masha bunita mes, cu interpretacion unico di su cancionnan, cu ta su propio composicionnan.
Na edad hoben di 8 aña Chantal a cuminsa canta y su tata a mira su talento y a pone na les cerca e maestro (q.p.e.d). Tony Worrelly y asina chantal a cuminsa canta den coro na Iglesia.
Cu 12 aña e tabata guia adoracion den iglesia Alpha & Omega. El a cuminsa desaroya tambe e habilidad pa skirbi cancion. Y esey e tabata haci te cu a forma un album di 8 cancion cu e mes a compone, loke ta hopi bunita di Chantal ta, cu e ta haña letra, ritmo y melodia na e mesun momento.
El a tene 3 concierto na Corsou y despues di esey tabata keda invita pa canta den diferente iglesia y concierto.
Su determinacion pa sigui den Alabansa y Adoracion a guia su mayornan pa manda Chantal studia afo na Skol di beibel CFNI( Christ For the Nations) na 2015. Na momento cu e tabata na e scol el a keda contrata pa canta na un iglesia Mesianiko na Dallas caminda tur diadomingo e tabata guia e adoracion.
Na 2017, Chantal a termina su estudio y gradua den“Bachelor Practical Ministries in Worship”. Na e mesun aña ey el a haña un peticion pa el a interpreta e himno di Estados Unidos na un celebracion grandi di “Stand for Israel” na Dallas, Texas.
E aña ey, tabata un aña hopi memorabel y emocional pa Chantal incluso na momento cu el a ricibi un invitacion pa canta himno di su Dushi pais, Corsou na cambio di aña riba Brionplein.
Tanten cu e tabata studia den e delaster aña na Skol di beibel( Christ For the Nations), el a haña oportunidad pa sigui un estudio na Dallas Baptist University y den corto tempo el a termina su estudio riba nivel HBO cu e titulo “Bachelor of art and science in inter-disciplinary studies with concentration in Music Business” na 2019.
Despues el a sigui pa 2 aña, esta na 2022, a gradua cu e titulo di “Master of Arts in Worship Studies”. Tambe den e mesun aña ey, el a drenta e barco matrimonial cu Nathan Pickens.
Mientras e tabata studia, su afan y determinacion pa busca mas di Dios a duna como resultado diferente composicion entre otro, su di tres produccion musical “Di Su Trono na mi Curason”, a haci un impacto inmensamente grandi den curason di hopi.
Pa nombra un paar di e concionnan : ”Digno”,“Habri e Shelu“,“Mas ku Sufisiente”,“ Yena Mi”, Kima den Mi” asina nos por menshona un cantidad di cancionnan exitoso di chantal.
Tambe e la graba cu New Beginnings team riba nan live recording aya na Dallas, Texas. Chantal a saca varios single, manera “Avivamentu”, “Disponibel”, “Nos Orashon” na papiamentu y uno na Ingles yama “Expectations”.
Otronan cancionnan cu a haci un impacto hopi grandi riba e publico ta, “Mesun Dios”, “When You Move” y tambe “E Nòmber”, cu ta un produccion di aña pasa.
Tur esakinan ta forma un cantidad di 15 produccion di Chantal mes. Tambe Chantal a yuda skirbi 2 composicion pa live recording na su iglesia na Estados Unidos Life Fellowship Church.
Pa e concierto “ E Nòmber” tin 2 cancion nobo nobo, cu e lo interpreta dia 18 di april proximo y ta ser graba “live”. Nos ta invita e pueblo di Aruba completo pa asisti masalmente pa bin experencia e presencia di Dios y drenta den e atmosfera divino y haña un encuentro cu e Dios bibo, Nos Cristo Hesus.
Aruba completo ta invita dia 18 di april 2026 , carchinan ta disponibel na Friends of God Bookstore na Oranjestad, Van dorp Dakota, tambe Citgo Boulevard, Citgo Essoville na San Nicolas. Pa mas informacion por yama na +59995246300.
