Despues di un periodo di 5 aña, ZiGGi Recado ta lansa su kantika titulá “Got my heart”. Un kantika di ‘reggae/dancehall’ ku sigur lo keda gustá pa tur ku ta skucha e género aki. Esaki ta promé di 8 kansion ku e artista aki ta preparando pa lansa. Kuminsando 7 di òktober e lo lansa 1 kantika tur djabièrne pa 8 siman largu. Kada kantika lo keda kompañá pa un ‘visualizer’, dunando tur tema un toke visual èkstra artístiko.
ZiGGi Recado (Rotterdam, 1981), kanta-outor i produktor di muzik, a krese i biba na St. Eustatius for di su promé te ku su 12 aña. Despues el a muda pa Aruba pa atende Colegio Arubano i na 1999 el a regresá pa Hulanda pa kontinuá su estudio na Rotterdam. Dor di su amor pa muzik, semper e tabata rondoná di personanan musikal. Esaki a pone ku den korto tempu el a drenta studio di grabashon i sigui desaroyá su mes musikalmente. Na 2008 el a lansa su albùm titulá “In Transit”, e album aki ta kontené e hit mundial “Need to tell you this”, kual ta e kantika ku a duna ‘ZiGGi Recado’ rekonosementu internashonal.
Despues ku su karera musikal a sigui progresá el a presentá riba diferente esenario di festivalnan grandi manera Sziget (Hongaria), Reggae on the River (Kalifornia), Lowlands (Hulanda) i Summerjam (Almenia). Tambe el duna konsierto den paisnan manera Portugal, Suesia, Fransia, Sudan, Cabo Verde, Colombia, India i hopi mas. Tur esaki kombiná ku hitnan manera “Gonna Leave”, “Mary” i “Blessed”, ta prueba ku ZiGGi Recado ta un artista di ‘reggae’ di taya.
Loke ta hasi ZiGGi Recado su proyekto nobo asina spesial, ta ku el a produsí, skibi i graba tur kantika aki na Kòrsou. E grabashonnan pa su 8 ‘visualizers’ tambe a ser grabá na Kòrsou en kolaborashon ku de Castro Studios. Banda di e proyekto aki, nos ta anunsiá ku ZiGGi Recado lo tene su promé konsierto na Kòrsou den e lunanan binidero. Esaki lo ta un evento úniko. Mas detayes lo sigui asina ku fecha i lokashon ta konfimá. ZiGGi Recado i su tim ta entusiasma pa kompartí su proyekto nobo ku pueblo di Kòrsou. I ta sumamente gradisido pa tur e inspirashon ku nos bunita isla a brind’e durante di su estadia aki. E ta spera ku su muzik lo yega na kurason di un i tur.
