Curacao: Despues di su hitnan manera “Move Tur Montaña”, “Nunka Entrega” y ‘’Un Brasa So Mi Ke” awor Shamiro Anita, e cantante di Gospel di Curacao, ta bolbe lansa un cantica nobo y su videoklip nobo titulá ”Sigui Pa Dilanti”. E mensahe special di Shamiro den e cantica aki ta: maske bo trompica y cay, maske tur speransa mester bay, maske hende lanta kontra bo, y maske ku e dolor no tin fin, no stop di persevera, no wak patras y Sigui pa Dilanti. Pasobra cu Dios e bataya ta gana y tin un futuro briyante ta warda bo.
Ta trata aki di un kantika ku Shamiro ta lansa, despues ku el a bin ta ekspandé su músika na spañó riba nivel internashonal, ku kantikanan manera “No Soy Igual Que Ayer”, “Volare” i “Guiame”. Tur su kantikanan na spañó a logra yega te den e tòp di músika na entre otro Medellín, Colombia i ta hitnan grandi riba YouTube.
Den e tempunan difísil ku nos aki na Kòrsou i mundu kompletu a pasa i ta pasando aden, Shamiro su músika ta sigui yuda hopi hende tantu lokal komo internashonal. E tremendo videoclip di e kantika nobo aki ta motivá i pusha pa lanta para, no entregá, no wak patras i kontinuá, pasó awor ta e momentu pa “Sigui pa Dilanti”.
Shamiro ta gradisí Dios na promé lugá i tur hende ku ta sostené, wak, skucha, i/òf kompartí su músika. Su orashon ta pa mas i mas hende rònt mundu keda bendishoná pa medio di e mensahenan positivo di Dios den su músika. P’esei su petishon ta pa tur hende sigui kompartí su kantikanan i videoclipnan ku otro pa asina mas i mas hende rònt mundu por “Sigui pa Dilanti”, paso ku Dios e bataya ta gana.
Por wak e videoclip “Sigui Pa Ditanti” i tur Shamiro su videoclipnan riba YouTube na https://www.youtube.com/watch?v=KgYT_hwP6go òf buska Shamiro Anita.
Riba e potrèt por mira Shamiro durante grabashon di e videoclip “Sigui Pa Dilanti” den Sentro Deportivo Kòrsou (SDK).
