Un delegacion di Gabinete di Minister Plenipotenciario, encabesa pa studiantenan Arubiano, a pone un krans na e monumento na Waalsdorpervlakte ariba “Dodenherdenking” diasabra 4 di mei 2026. Tambe presente tabata hefe di departamento huridico di Gabinete di Aruba Shandra John, mentor pa region di Den Haag Shahaira Brokke y functionarionan di Ministerio di Relacionnan di Reino di Aruba.
E conmemoracion ariba “Dodenherdenking” na Waalsdorpervlakte ta un lugar y monumento cu un significacion special, pasobra e monumento ta na e sitio unda durante di segunda Guera Mundial hopi persona cu tabata forma parti di e resistencia (verzet) contra di e ocupacion Aleman a wordo fusila. Entre nan e hoben Arubiano Boy Ecury cu hunto cu otro miembronan di resitencia a haya su morto pa medio di un peleton di bala ariba 6 november 1944.
Pa añanan Gabinete di Minister Plenipotenciario a participa na e conmemoracion aki – cu excepcion durante e periodo di Covid, unda e conmemoracion no a tuma lugar – cual momento ta importante pa di e manera aki tene na bida e memoria y e storia di bida di Boy Ecury.
Despues di e dos minuut di silencio y cu e himno nacional di Hulanda Wilhelmus a sona, a toca e oportunidad pa pone un krans of flor na e monumento na Waalsdorpervlakte. E delegacion Arubiano a haci esaki unda dos studiantenan Arubiano a pone un krans.
