ORANJESTAD – Aruba Tourism Authority ta informa cu pa luna di juli nos destinacion a ricibi un total di 100.178 bishitante ‘stay-over’.
Si compara luna di juli 2021 cu juli 2019 -cu tawata e ultimo aña normal di turismo, por deduci cu Aruba a recupera cu 97% di locual a wordo ricibi na juli 2019. Remarkabel ta e hecho cu Merca a mustra un crecemento di 9% compara cu juli 2019 y Hulanda un crecemento di 39% compara cu juli 2019.
RECUPERACION FUERTE
Aruba ta sigui recupera fuerte desde e re-apertura di nos frontera na juli aña pasa y por mira e tendencia di recuperacion mensual pa e aña aki ta mustra un grado di recuperacion mas fuerte segun ta cera cada luna di 2021.
Pa e prome 7 luna di 2021, Aruba a ricibi un total di 426.565 bishitante.
E proyeccionnan pa di dos mita di aña ta mustra cu lo por sigui duna un adelanto y ta proyecta pa cera 2021 cu un recuperacion di 76% di turismo compara di loke Aruba ricibi na aña 2019.
Aruba ta wordo representa den tres diferente continente. Norte America ta e mercado mas fuerte y entre januari pa juli 2021 un total di 377.781 bishitantenan Norte Americano a bishita Aruba. Esaki ta 88.6% di total di nos turistanan. Durante e mesun temporada, Europa a trece 22.430 turista pa Aruba cu ta 5.3% di e total di bishitantenan. Un total di 14.819 turista cu ta representa 3.5% tawata procedente di Latino America. 2.7% -cu ta 11.535 bishitante, a bishita nos isla for di otro partinan di mundo.
TURISMO CRUCERO
Na juni Aruba a habri atrobe pa ricibi turismo crucero y entre juni y juli 2021 un total di 6,930 pasaheronan crucero a bishita nos isla. Turismo crucero lo sigui ta un proceso di recuperacion gradual. Siman pasa reunionnan fructifero a tuma luga entre diferente lineanan crucero di importancia pa nos destinacion y asina planeando pa turismo crucero pa 2022 y 2023.
Ta bon pa recorda cu e situacion di e barconan crucero ta recuperando y ainda tin barconan staciona den un asina yama ‘Warm lay-up’ cual kiermen cu e barco ta riba un standby, wardando riba instruccion na momento cu operacionnan re-inicia. E actividad aki ta produci cierto entrada pa nos economia entre otro unda e barconan ta abastece nan productonan localmente. No tin turista riba e barconan pero solamente e minimo na tripulante (skeleton crew) y nan mester cumpli estrictamente cu tur protocol local y internacional pa loke ta e pandemia actual.
Poco poco nos industria di turismo lo ‘normalisa‘ bek cu ahustacionnan pa asina tene e seguridad di e bishitantenan como tambe e localnan na prome luga.
TOURISM CREDITS / CENTRAL BANK OF ARUBA
Di acuerdo cu Banco Central e asina yama ‘Tourism Credits’ (cual anteriomente tawata wordo yama ‘Tourism Receipts’) pa e prome kwartaal di aña 2021 a contribui cu AWG 554.5 miyon den nos economia, cu ta 46% menos compara cu e mesun temporada na 2020. Esaki naturalmente ta debi na e pandemia global di Covid-19 unda Aruba tambe a cera su fronteranan temporalmente cual a inicia na luna di maart 2020 te cu juli 2020.
E IMPORTANCIA PA VACUNA Y SIGUI MANTENE NOS MES NA E PROTOCOLNAN
Aruba Tourism Authority ta sigui traha fuerte riba e recuperacion turistico, enfocando no solamente riba cantidad di bishitante, pero tambe riba e maneho solido di e organisacion di A.T.A. y e maneho duradero di nos producto turistico.
E participacion di nos comunidad pa loke ta trata vacuna y pa mantene nos mes na e protocolnan estableci door di diferente instancia ta masha importante pa baha e cantidad di casonan positivo di Covid-19 y su variantenan na Aruba. Asina nos economia ta recupera y por sigui progresa.
Corda cu solamente hunto nos por vence pa asina nos isla y su turismo por sigui florece.
