Aruba Bank a cera cuenta di compania cu a cobra 2.5 miyon for di RDA
A usa un bunita nomber di “Algen”, “energia berde” pa comete estafa miyonario
Den e compania di Gobierno, RDA, a tuma lugar un estafa hamas bisto den cualkier compania NV di Gobierno di ultimo decadanan.
Awe nos ta trata e compania GTS, pa cual un famia Venezolano di faam Ortega a hunga un rol grandi den estafa aki.
Nos por conclui cu ta trata aki di algo hopi robes y inusual cu a tuma lugar unda e compania aki a haya ta bon pa cobra 2.5 miyon pa un projecto spirito.
Fuentenan na altura a divulga na Solo di Pueblo, cu atraves di e compania aki, fiestamento tabata tuma lugar, unda e placa tabata wordo lanta, cobra, saca cash for di banco y unda despues tabata reparti e placa aki pa varios persona, unda no por exclui cu tambe Minister Mike de Meza lo por tabata ricibi placa di GTS.
Hecho ta cu a usa un bunita nomber, “Algen”, un fuente di energia berde, pa asina comete un corupcion sin precendente.
Loke a sosode aki, ta masha mahos mes, unda fondonan di pueblo a wordo destina den un compania, cu tabata saca placa di pueblo, pa asina enrikece nan mes, y despues parti e placa aki cu otronan di Partido AVP.
E asunto aki no por bay impune! Pesey mes ta pidi Ministerio Publico, pa porfavor, acelera e investigacion di corupcion, cual ta envolvi varios Minister di Gabinete Mike Eman, Mike de Meza, Richard Arends, y mucho mucho mas cu tabata accepta soborno, ricibi placa, parti placa.
Ora cu Aruba Bank y MOT su alarma a cuminza bati te rementa, Aruba Bank a dicidi pa cera cuenta di GTS, projecto Algen, “energia berde”.
Mike Eman tin hopi cuenta pa duna pueblo. Aki ta un bon ehempel cu energia berde, green energy a wordo usa solamente pa saca placa di pais Aruba y di su companianan nv.
