Den cuadro di su celebracion di 100 aña di existencia, Aruba Bank a entrega un donacion di AWG 100.000 na Cas di Cultura, y alabes aporta na e proyecto di renobacion “E Brasa”, un proyecto innovador cu lo sirbi como nos centro creativo y plataforma pa talento local. E contribucion ta parti di e “Legacy Project” di Aruba Bank, un iniciativa cu ta enfatisa e compromiso di e banco pionero y sosten na e comunidad di Aruba den diferente area, incluyendo educacion, salud, flora y fauna, y cultura.
“E Brasa” ta un idea ambicioso cu lo crea oportunidad pa expresion creativo, formacion y colaboracion entre artista, scol, y miembronan di nos comunidad. E proyecto lo contribui na fortalecimento di nos identidad cultural y lo duna un empuhe real na e sector creativo di Aruba.
Sharon Fränkel, Managing Director di Aruba Bank, a splica:
“Nos ta kere cu pa un comunidad ta fuerte y resiliente, mester tin espacio pa e por florece. Arte y cultura ta forma parti di e curason di un pueblo. Cu e donacion aki, Aruba Bank ta pone su ‘brasa’ den e sector creativo di nos comunidad.”
Vicky Arens, directora di Cas di Cultura a expresa su gran gratitud pa e aporte y a confirma cu e donacion lo sirbi pa mehora infrastructura, facilita programanan educativo y realisa e vision creativo cu ta fundamental pa futuro di Cas di Cultura.
Aruba Bank ta invita nos comunidad pa sigui e desaroyo di e proyecto via Cas di Cultura su plataforma digital y ta pone enfasis riba importancia di sostene e sector cultural como un inversion pa e bienestar di Aruba en general.
