Aruba Bank ta reconoce cu orguyo y ta celebra dos colega excepcional, Lilian Hoek y Brenda Frank, cu nan añanan combina di dedicacion, profesionalismo y lealtad cu a laga un impacto duradero riba e banco y su operacionnan di seguro.
Lilian Hoek ta conclui un carera extraordinario di mas cu 40 aña den e industria di seguro, incluyendo 30 aña di servicio dedica na Aruba Bank. Durante henter su carera, Lilian tabata un pilar di conocimiento, stabilidad y liderazgo. Su experiencia den sistema nan di seguro, su atencion firme pa detaye y su dedicacion na responsabilidad a haci di dje un mentor y guia di confiansa pa hopi colega. E orguyo y pasion di Lilian pa su trabou, su lealtad na Aruba Bank y su disponibilidad pa enfrenta cambionan cu confiansa a pone un ehempel remarcabel. Su legado ta uno di excelencia, disciplina y conocimiento institucional cu lo sigui inspira futuro generacionnan.
Brenda Frank tambe ta bisa ayo na Aruba Bank despues di a drenta na 1989. Cuminsando su carera como Teller, poco poco e a crece pa bira un Collection Officer hopi respeta den e departamento di seguro. Conoci pa su persistencia, precision y dedicacion sin igual den maneho di portfolio, Brenda a hunga un rol vital den proteccion di interesnan di e banco. E tabata admira pa su manera cariñoso, su disposicion pa yuda colega nan y e parti humano cu e a trece na lugar di trabou. Su compromiso, confiabilidad y toke humano a haci di dje un colega y amiga balora.
Aruba Bank ta extende su sincero agradecimiento na tanto Lilian como Brenda pa nan hopi aña di servicio sobresaliente, lealtad y contribucionnan. Nan profesionalismo y dedicacion a yuda forma e fortalesa y integridad di e operacionnan di seguro di Aruba Bank.
Mientras cu nan ta cuminsa e capitulo nobo aki, Aruba Bank ta desea Lilian y Brenda salud continuo, felicidad y satisfaccion den nan siguiente paso di nan bida. Cu e capitulo nobo aki trece nan e descanso bon mereci, aventura nobo y mas tempo pa disfruta di e pasionnan y hende nan cu nan ta stima.
Na nomber di gerencia y colega nan, danki, Lilian y Brenda, pa tur loke nan a duna Aruba Bank. Lo sinti nan falta sigur y lo keda recorda tur e momento bunitanan comparti.
