Aruba Bank a entrega oficialmente un donacion di AWG 100.000 na Scol Dun’un Man, como parti integral di su celebracion di 100 aña y su “Legacy Project”.
E acto di entrega a tuma luga awe na e scol, den presencia di studiantenan, personal y docente y representantenan di Aruba Bank.
Cu enfoke fuerte riba invercionnan cu tin un impacto profundo y duradero den nos comunidad, Aruba Bank a scoge pa apoya un scol cu un mision cla: duna chens real y digno na nos muchanan special.
E donacion ta destina pa realisa un proyecto inspirador:
“The Kind Kitchen”, un cushina y restaurant integra, diseña pa duna e studiante oportunidad pa siña habilidadnan culinario y na mes momento preserva nos cultura gastronomico.
“E proyecto aki ta mas cu un cushina, e ta un espacio di empoderamento y desaroyo personal,” asina Edseline Leer – Semeleer, Head of Retail Banking a comparti durante e ceremonia.
Aruba Bank ta honra di por forma parti di e desaroyo di esnan cu ta forma e futuro di Aruba. E banco ta sumamente orguyoso pa por contribui na e crecemento di e studiantenan di Scol Dun’un Man.
