Aruba Bank a anuncia su apoyo financiero na tur grupo di Carnaval di mucha, como respuesta na peticionan ricibi na fin di 2025 pa sosten pa temporada di carnival 2026.
Carnaval di mucha ta forma un gran parti di nos cultura. E ta fomenta creatividad, orguyo di comunidad y participacion di muchanan y hobenan, y na mes momento ta pasa nos tradicion di generacion pa generacion.
Cu e pensamento aki, Aruba Bank a dicidi di contribui activamente na continuidad y preservacion di e tradicion aki.
Pa sostene e esfuersonan di e grupo y pa yuda cubri parti di e gastonan relaciona cu preparacion di carnaval, Aruba Bank ta haci un donacion di AWG 10.000 na cada grupo participante. E donacion ta dirigi pa yuda cu gastonan operacional y logistico, reconociendo cu organisa un grupo di carnival ta rekeri hopi dedicacion, tempo y recurso. E grupo cu lo ricibi e apoyo financiero ta: Grupo Noord, Little Groovers, Unity Carnival Group, Don Flip, Empire Kids, Champagne Kids y TOB Kids.
“Pa Aruba Bank, inverti den nos muchanan y hobennan ta inverti den futuro di Aruba. Apoyo na nos Carnaval di mucha ta perfectamente alinea cu nos compromiso cu desaroyo comunitario, preservacion cultural y impacto duradero,” segun Marleen v/d Borgt, Managing Director di Aruba Bank.
Aruba Bank ta expresa su agradecimiento na tur lider, boluntario, mayor y muchanan cu ta traha duro pa mantene e tradicion di carnaval bibo. E banco ta desea tur grupo hopi exito y un temporada di carnaval yen di alegria y briyo riba caminda.
