Recientemente, Aruba Conservation Foundation (ACF) y Stichting Vogelpark Avifauna for di Hulanda a firma un Memorandum of Understanding (MOU) di 10 aña pa avansa e siguiente capitulo di e Programa di Reintroduccion y Conservacion di Lora. E colaboracion di largo plazo aki ta formalisa e cooperacion riba cria, traslado sigur, liberacion, monitoreo, investigacion y involucracion di comunidad, tur elemento esencial pa construi un poblacion di Lora autosostenibel na Aruba.
E ultimo Amazona barbadensis, conoci localmente como ‘Lora’, a wordo mira den naturalesa na Aruba na aña 1947, ora cu extincion di e especie localmente a tuma luga debi na captura ilegal pa comercio di mascotanan, persecucion como plaga den agricultura, y perdida di habitat.
Na 2024, despues di hopi planificacion y preparacion hunto cu partnernan local, regional y internacional, ACF a logra reintroduci e prome 25 Lora den naturalesa di Aruba como parti di su Programa di Reintroduccion y Conservacion di Lora. E loranan aki, cu anteriormente a wordo confisca for di comercio ilegal, awor ta bula liber y a cuminsa reproduci mas prome cu a spera.
Sin embargo, pa e poblacion di Lora bira berdaderamente autosostenibel, lo ta necesario pa sigui añadi Loranan cu salud genetico fuerte. Solamente door di fortalece e poblacion di Lora continuamente cu aportenan genetico nobo, e Lora lo bira mas resistente y sostenibel.
E MOU cu Avifauna, e coordinador apunta pa e European Association of Zoos and Aquaria (EAZA) Ex-Situ Programme (EEP) pa Lora, ta brinda e marco di largo plazo pa amplia esfuersonan di cria y liberacion maneha cuidadosamente den e siguiente dies aña. Como parti di e EEP, Loranan selecta ta wordo cria den un haula di parha specialmente diseña na Hulanda. Despues den un fase posterior, otro institucionnan zoologico acredita na Europa lo uni na e programa. E facilidadnan aki ta mantene temperatura controla y condicionnan maneha cuidadosamente, optimal pa salud y bienestar di e parhanan. E Loranan no ta simplemente biba den captura den zoologico na Avifauna, sino ta forma parti di un programa internacional di cria pa conservacion, crea specificamente pa sostene nan regreso na bida salvahe na Aruba.
Avifauna su Compromiso
Bou di e acuerdo aki, Avifauna lo coordina e programa Europeo di cria pa Lora den colaboracion estrecho cu ACF, supervisando e seleccion y cuido di cria di Loranan den institucionnan acredita. E organizacion lo percura tur permiso necesario, certificacion di salud, y coordina e transporte sigur di e parhanan pa Aruba como preparacion pa nan liberacion.
Ademas, Avifauna lo brinda orientacion continuo riba cuido veterinario y maneho di especie, promove e Programa di Reintroduccion di Lora y e esfuersonan di conservacion di Aruba den rednan zoologico Europeo, sostene iniciativa di investigacion y monitoreo pa studiantenan, y busca activamente financiamiento pa fortalece tanto e programa di cria y e programa di reintroduccion.
ACF su Compromiso
ACF lo lidera e operacionnan di liberacion na Aruba, asegura un condicion y cuido optimal prome cu liberacion, coordina trabou den veld, investigacion y monitoreo, boga pa maneho di proteccion fuerte y cumplimento, y sigui cu accionnan di restauracion di habitat, incluyendo planta matanan nativo cu ta sirbi como alimento y colocacion di cas artificial unda ta necesario.
ACF tambe lo amplia involucracion di comunidad door di educacion y iniciativa di ciencia comunitario, y mantene colaboracion regional cu partnernan den Caribe pa asegura cu e programa ta refleha e miho practicanan den ciencia di conservacion.
ACF y Avifauna a bin ta traha hunto desde 2019, pero e bishita di ACF na Hulanda na october 2025 a marca un punto decisivo. Discusionnan strategico durante e bishita a pone e base pa amplia e programa y formalisa e compromiso pa 10 aña, un paso importante den colaboracion internacional pa restauracion di biodiversidad di Aruba.
“Wak nan bula den naturalesa atrobe, y cuminsa reproduci, ta mustra nos cu naturalesa ta responde ora bo dun’e un oportunidad,” asina Natasha Silva, Chief Conservation Officer di ACF, ta bisa. “Pero speransa so no ta suficiente pa asegura nan futuro. E compromiso di 10 aña ta asegura cu nos ta haci e trabou serio, disciplina y constante cu ta necesario pa construi un poblacion di Lora berdaderamente autosostenibel na Aruba. Ami casi sigur no lo experiencia e momento cu e poblacion di Lora ta para completamente riba nan mes, pero esey no ta cambia e responsabilidad cu nos tin pa sigui traha den e direccion ey. Nos ta restaurando un especie na su cas natural, permanentemente. Pa e generacionnan cu ta bin.”
