Despues di 3 dia largo di competencia, Aruba ta conkista un Medalla di Brons den e Categoria di Amazonas 25+, un logro sumamente importante pa Lea Vink.
Durante un categoria cu a tarda 2 ora cu competencia hopi fuerte, Lea Vink a logra Medalla di Brons pa Aruba.
Enfrentando competencia hopi fuerte di Puerto Rico, USA, Colombia, Corsou y Venezuela, Aruba a saca cara pa demonstra e calidad cu nos tin den Equitacion.
Ariba diahuebs, e prome dia di competencia Mia Rose Tromp a hasi un bunita presentacion pero no a logra clasifica pa sigi. Diabierna den su debut den un Mundial, Zachary Coffie a clasifica entre 11 jinete pa e siguiente etapa, pero no a logra keda cu un di e 6 premiacion cu tin. Diasabra a cuminsa cu Courtney Irausquin, ken a hasi un bunita recorrido pero entre competencia fuerta y di 4 ora, no a logra clasifica den e categoria di 15-17 anja.
Carolina de Cuba y Genesis Pietersz ambos a representa Aruba den categoria di 18-20 anja, caminda Genesis a logra clasifica entre 10 Amazona, y aunke a hanja palabra di elogio di e juez, no a logra pa por a hanja un cinta. Den un competencia caminda e pais anfitrion a domina mayoria di e categorianan y bay cu mayoria di medaya, OCA ta hopi orguyoso di e presentacion di nos Jinete & Amazona.
