Aruba Doet, cu ta organiza door di CEDE Aruba y cu sosten financiero di Oranje Fonds, ke enfatisa cu trabou boluntario ta importante pa comunidad. E ta trese cune un sentimiento di satisfaccion bou e boluntarionan cu ta mira con nan aporte ta beneficia organisacionan den necesidad di ayudo. Trabounan boluntario ta planta e balor di yuda otro den esunnan di mas chikito den nos comunidad door di mira e ehempel di nan mayornan, dunando nan tambe e gana di ke bay haci algo bon y keda cu e bon sentimento di por a brinda yudansa na un cu mester. Ta p’esey mes e lema di Aruba Doet ta: “Haci bon, pasa bon”. Aruba Doet ta crea tambe un conexion entre e boluntario y e organisacion, cu e idea pa e trabou boluntario bira algo continuo na unda cu e sosten ta sigui despues di e accion.

Riba diabierna 10 y diasabra 11 di maart 2023 CEDE Aruba, den cooperacion cu Oranje Fonds, lo ta organisando Aruba Doet pa di 11 aña tras di otro! Esaki ta un oportunidad pa organisacionnan social haci trabou pa of actividadnan social cu nan grupo di interes cu ayudo di boluntarionan. Projectonan manera verf un muraya, duna un luga di recreacion pa mucha un face lift, organisa un actvidad pa hende grandi of traha un heki nobo na un animal shelter.

E deadline pa inscribi un proyecto ta DIALUNA 23 DI JANUARI.

Fundacionnan, scolnan, scouting clubnan, organisacionnan deportivo, Centronan di Bario cu teinda lo ke registra un projecto por haci esaki via e website www.arubadoet.com. Pa mas informacion por manda WhatsApp of yama Aruba Doet na 561 1644.

Participacion den Aruba Doet ta duna e isla un impulso positivo. Organisacionan cu ta participa lo por logra metanan cu sin ayudo di boluntario nunca nan lo por a logra. Riba dje, esaki lo bira sigur un dia hopi anima y cu yen di inspiracion pa tur!

Aruba su boluntarionan simper a participa masalmente cu hopi entusiasmo y lo pone nan marca den e di 11 aña di Aruba Doet! Boso ta cla?

LEAVE A REPLY

Please enter your comment!
Please enter your name here