E aña aki Aruba Excellence Foundation (A.E.F.) tabata tin e honor pa entrega plakaat di reconocimento na 10 organisacion cu a percura pa full nan team ta 100% A.C.P. Certified.
Desde aña 2017 a cuminsa entrega plakaat di reconocimento na companianan cu a certifica full nan team. Cada compania a percura pa tur miembro di team participa cu e curso di Aruba Certificaion Program (A.C.P.), pa asina tur hende sea cu ta traha directamente of indirectamente den e sector di turismo por ta un embahador capacita cu tur informacion di Aruba, y cu ta brinda servicio cu Zjeito.
Actualmente tin 28 organisacion cu tin e status di 100% Aruba Certified.
Pabien ta bai pa Costa Linda Beach Resort, Cas di Cultura, Starbucks, Manchebo Beach Resort & Spa, Aruba International Relocations, Eco Destinations, Fofoti Tours, Jeff Classic Tours y Elements of Aruba cu e bunita logro aki. Por ultimo tin Paradise Beach Villas cu ta e unico resort cu a re-certifica henter e hotel pa di dos biaha. Cada compania a manda un representante pa ricibi e plakaat di reconocimento.
Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.
