ORANJESTAD – Aruba Excellence Foundation ta lansa un jingle nobo acohedor pa un campaña di TikTok Challenge. Meta di e campaña ta pa henter Aruba conecta cu e balornan di Aruba su Zjeito cu ta haci nos isla destaca cu nos manera di brinda servicio na tanto local y turista.
Como premio e ganador di e TikTok challenge lo ricibi un Samsung Galaxy S20 patrocina pa Setar N.V.
E jingle cu tin e nomber ‘Mi Zjeito’ ta un colaboracion cu Music Creator Stefan Bartelsdaal , miho conoci como Steve Andreas y letras y vocals pa Ataniro Eisden ‘La leyenda’. A crea e jingle basa ariba e 9 balornan di Aruba su Zjeito cu ta incorpora den e Programa di Certificacion di Aruba, A.C.P.
E palabra ’zjeito’ ta nifica, ora cu un persona ta sea presenta, canta of baila cu hopi smaak. Den e programa di A.C.P. a identifica 9 balor cu ta destaca y cual ta wordo refleha den e manera unico cu nos ta brinda servicio. E 9 balornan ta Amor, Union, Autenticidad, Orguyo, Conserva, Libertad, Carisma,Celebra y Creatividad. Brinda servicio a base di e balornan aki, kermen cu bo ta brinda servicio cu Aruba su ‘Zjeito’.
Con pa participa?
Pa participa cu e Zjeito TikTok Challenge mester:
1. Graba un video bailando ariba e choreografia demostra, usando e sound di #mizjeito.
2.Tag: @acp_zjeito.
3. Personanan residencia na Aruba y registra na Censo so por participa.
4. Personanan di tur edad por participa.
5. Bestuario di participante den video mester ta descente y no sunu.
Ganador lo wordo escohi abase di e video:
1. Mas original
2. Cu mas Likes
3. Cu mas Zjeito
Deadline pa entrega e video pa participacion lo ta 1 di September 2021 pa 6:00 PM. Ganador lo wordo anuncia 6 di September 2021 pa 6:00 PM riba e Facebook page di Aruba Certification Program.
Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, pa asina percura cu e nivel di servicio excelente di Aruba ya bon conoci, por keda riba un nivel halto.
