Diadomingo ultimo den Bubali Ballroom na Embassy Suites bunita decora y cu un ambiente festivo a tuma lugar e instalacion di e directiva nobo pa e aña leonistico 2026-2027 di Aruba Lions Club. Pa e evenemento aki representantenan di diferente club di servicio aki na Aruba tawata presente pa e instalacion di e miembronan cu ta forma parti di e directiva nobo di Aruba Lions Club.
E ex Gobernador di Districto 35-N esta Sr. Ivan Croes tawata esun encarga pa instala e miembronan nobo di e directiva. Como Presidente a ser instala Sr. Gerardo Figaroa. E Vice Presidente a keda den persona di Sr. Ryan Ras. Como Secretaria a bira Sra. Swinda Roga y e tesorera di e club a keda den mannan di Sra. Magaly Franken. Esakinan ta forma e directiva diario di e club y e demas miembronan ta:
Director 1 aña ta Sra. Dietje Muduro y Director 2 aña ta den e persona di Sra. Sheila Maduro. Como Director di Miembrecia nos tin Sra. Mirla Koolman, mientras pa Leo Advisor a keda instala Sra. Vanesa Olive. Por ultimo nos tin Sr. Edmar Lopez, kende ta e President saliente y cu a keda instala com e Lion Tamer y Twister di e club.
Durante e speech di e President nobo, Sr. Gerardo Figaroa a trece entre otro padilanti cu e lo haci enfasis riba e siguiente balornan: famia, amistad, co-existencia, union, integridad, liderazgo, consistencia, motivacion, structura, transparencia, coperacion, encurashamento, empodera, forza, honestidad, habri pa scucha y e spirito oa sirbi esnan den nececidad. E balornan aki lo ta e guia pa e club pe aña leonistico 2026-2027.
Lesa speech completo aki:
Aruba Lions Club ta parti di Districto 35-N cu ta consisti di Florida, Bahamas, Aruba, Bonaire, Curacao y ta un club di servicio cu pa casi 80 aña caba ta trahando pa e comunidad di Aruba y ta bao di auspicio di Lions Club Internacional cu ta consisti di mas cu 46 mil club den mas di 200 pais y ta conta cu mas di 1.4 miyon miembro rond mundo y a cumpli 109 aña di existencia cu ta hacie e organisacion di servicio mas bieuw y mas grandi mundialmente.
Pa termina Aruba Lions Club ta compromete su mes pa sigui traha boluntariamente pa nos comunidad y ta gradici e pueblo di Aruba cu semper a sa di copera y sostene cada actividad y recaudacion di fondo. Y ta pidi pueblo en general pa keda pendiente pa proximo actividadnan na caminda.
