Aruba Lions Club ultimo lunanan ta hayando hopi atencion internacionalmente y ta pa es motibo aki cu e club ta ricibiendo diferente bishita di exterior. Durante e ultimo reunion di club Aruba Lions Club tawata honra di por a ricibi Lion Ty’East Alleyne-Bobb kende ta miembro di Central Brooklyn Lions Club Inc. y ta First Vice Governor di Lions di Brooklyn y Queens New York, Districto 20-K. Cu ta districto tambe di e Past Presidente Internacional Lion Douglas Alexander di Districto Multiple 20 – New York State y Bermuda.
Su estadia riba nos isla tawata cortico pero ela keda masha hopi impresiona di e forma con ela ser ricibi y mas ainda e gentileza, cordialidad y amabilidad di su hendenan. Ela elogia e trabaonan cu Aruba Lions Club ta haciendo pa e comunidad di Aruba y na mes un momento ela ofrece pa yuda e club cu su experiencia, conseho y coneccionan cu e tin. Despues di intercambio di regalonan ela despedi y a sigui pa su bustrip cu su amistadesnan cu a bin di Merca specialmente pa celebra e cumpleaños di un di su amistad aki na Aruba.
Den e transcurso di añanan ta hopi bishita di exterior Aruba Lions Club a yega di ricibi y esaki lo sigui tambe ta e caso den e temponan nos dilanti.
Aruba Lions Club ta un club di servicio cu pa casi 80 aña caba ta trahando pa e comunidad di Aruba y ta bao di auspicio di Lions Club Internacional cu ta consisti di mas cu 46 mil club den mas di 200 pais y ta conta cu mas di 1.4 miyon miembro rond mundo y a cumpli 109 aña di existencia cu ta hacie e organisacion di servicio mas bieuw y mas grandi mundialmente.
Por ultimo Aruba Lions Club ta compromete su mes pa sigui traha hunto cu su partnernan pa yuda mehora e calidad di bida di e pueblo pa medio di su diferente programa di servicio manera esun di Hospital Bed y Wheel Chair, Smile Mobile, Feria di Salud, Back to School Food Bags, X-mas food baskets etc.
Ta pidi pa pueblo keda pendiente pa Aruba Lions Club su siguiente actividad. “WE SERVE”
