Dia 15 di oktober ultimo Aruba Lions Club (ALC) a organisa un charla tocante Glaucoma. Meta di esaki ta pa informa y conscientisa pueblo di e malesa aki.
Glaucoma ta un malesa di wowo cu si no wordo trata ta ocasiona cu un hende ta perde su bista. Mayoria biaha hende no sa mes cu nan tin Glaucoma. Aunke no tin cura, ta bon pa haci test y keda bay na e control di wowo(nan). Ta importante pa por haya of sigui haya tratamento pa reduci e progreso di dañonan di nervio den wowo cu Glaucoma ta ocasiona. Dr. Angela Garces specialista di wowo en especial Glaucoma a duna un presentacion caminda e la duna informacion extenso tocante Glaucoma. Dr. Angela Garces ta traha na ImSan. Durante e anochi aki publico a haya oportunidad pa haci tur pregunta cu nan tabata tin. Dr. Garces a enfatisa riba e importancia di keda bin na e control nan y tuma remedi.
Un danki special ta bay pa dokter Garces pa tur informacion. Debi na e interes grandi na ultimo momento mester a cambia na un localidad cu mas espacio. Un danki na Xavier University cu a habri porta pa Aruba Lions Club por a tene e charla serca nan. Aruba Lions Club ta forma parti di Lions Club International. Na Aruba tin 2 Club cual Aruba Lions Club ta esun mas grandi y ta sirbi comunidad ya pa 78 aña. Un di e meta nan di Lions Club International y Aruba Lions Club ta ofrece concientisacion riba salud di bista.
